2017-ci il mayın 10-da Polşanın Azərbaycandakı Fövqaladə və Səlahiyyətli səfiri Marek Kalva və səfirliyin III katibi Anna Witak Xəzər Universitetində oldular. Universitetin rektoru Hassan Niknafs Polşa səfirini və III katibi qəbul etdi, səfirə universitetdəki elmi fəaliyyət haqqında geniş məlumat verdi. Sonra isə polşalı diplomatlar Tarix departamentinin tələbələri ilə birlikdə yüz il bundan öncə Azərbaycanda yaşamış və fəaliyyət göstərmiş polşalıların tarixinə həsr edilmiş dərsi dinlədilər. Dərsdə Polşanın səfiri və Tarix departamentinin müəllimi Nəsiman Yaqublu çıxış etdilər və tələbələrə Azərbaycanda fəaliyyət göstərən polşalıların şanlı tarixindən danışdılar.
Sonra Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı polşalı diplomatları qəbul etdi. Onlara universitetin quruluş tarixindən və bu günə kimi olan fəaliyyətindən danışdı. Səfir M.Kalva Polşa ilə Azərbaycan arasında əlaqələrin yüksələn xətlə inkişaf etdiyini vurğuladı və gələcəkdə Xəzər Universiteti ilə birlikdə hər iki dövlətin yaradılmasının yüz illiyinə həsr edilmiş elmi konfrans keçirilməsini təklif etdi. Səfir xoş qəbul üçün universitet rəhbərliyinə təşəkkürünü bildirdi. Görüşlərdə Polşa səfirliyinin III katibi Anna Witak və Xəzər Universitetinin İctimai əlaqələr və media üzrə direktoru Əlövsət Əmirbəyli iştirak etdilər.