2017-ci il mayın 5-də Xəzər Universitetində universitetin Tarix və arxeologiya departamentinin təşkilatçılığı ilə “Olduğu kimi görünən insan” kitabının təqdimatı keçirildi. Kitab görkəmli tarixçi alim, BDU-nun professoru Elmira Muradəliyevanın seçilmiş  əsərləri, onun haqqında yazılmış məqalələr, biblioqrafiya və filmoqrafiyadan ibarət tərtib olunmuşdur. Tərtibçilər tarix üzrə fəlsəfə doktoru Nigar İbrahimova və Güllü Cahangir, ixtisas  redaktoru tarix üzrə fəlsəfə doktoru Fərhad Cabbarov, kitabın əsas redaktoru yazıçı-publisist, kinoreyissor Nazim Rzadır. Nazim Rza kitaba “Aydın yolun yolçusu” adlı geniş ön söz də yazmışdır.

Tədbirdə görkəmli alimin həmkarları, yetirmələri, universitetin əməkdaşları və tarix müəllimliyi ixtisasının tələbələri iştirak edirdilər.

Təqdimatı giriş sözü ilə Tarix və arxeologiya departamentinin müdiri, tarix üzrə fəlsəfə doktoru Roza Arazova açaraq, Elmira Muradəliyevanın zəngin yaradıcılığı və şəxsi keyfiyyətləri haqqında danışdı. Tədbirin aparıcısı Nazim Rza da bu mövzuda söhbəti davam etdirdi.

Sonra tədbirdə iştirk edənlər görkəmli alim haqqında öz ürək sözlərini söylədilər. Yazıçı və tədqiqatçı Teyyub Qurban, Xəzər Universitetinin İctimai əlaqələr və media üzrə direktoru Əlövsət Əmirbəyli, ictimai xadim Dilarə Vəliyeva, ADPU Azərbaycan tarixi kafedrasının əməkdaşı İradə Qasımova, təhsil eksperti Nabatəli Qulamoğlu, tarix üzrə fəlsəfə doktoru, Milli Azərbaycan Tarix Muzeyinin elmi katibi Fərhad Cabbarov, tarix üzrə fəlsəfə doktoru, BSU-nun jurnalistika kafedrasının dosenti Mübariz Əhmədov, BP şirkətinin əməkdaşı Nərminə Xəlilova,BDU-nin dosenti Elvira Lətifova və TRASERA Hökümətlərarası Komissiyanın daimi katibliyinin ictimai əlaqələr üzrə eksperti, BDU doktorantı Samirə Rəfizadə çıxış edərək, Elmira Muradəliyevanın çoxşaxəli yaradıcılığından, cəsarətli və obyektiv alim mövqeyindən, tələbələrinə, magistr və doktorant yetirmələrinə böyük diqqət və qayğısından, yüksək şəxsi keyfiyyətlərindən danışdılar.

Tədbirin sinunda professor Elmira Muradəliyeva tələbələrin suallarını cavablandırdı, Xəzər Universitetinin rəhbərliyinə və iştirakçılara təşəkkürünü bildirdi. Alimə gül dəstələri təqdim olundu.