2017-ci il aprelin 24-də Xəzər Universiteti Tarix və arxeologiya departamentinin müdiri, tarix elmləri üzrə fəlsəfə doktoru, universitet fəaliyyətə başlayandan burada çalışan Roza Arazovanın 70 illiyi münasibətilə yubiley tədbiri keçirildi.
Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı çıxış edərək,ötən illər ərzində Roza Arazovanın yüksək səviyyəli tarixçi kadrların hazırlanmasında, departamentin gənc müəllimlərinin əsl peşəkar kimi yetişməsində misilsiz xidmətlərindən, tələbələrə böyük diqqətlə yanaşı, həm də ciddi tələbkarlıqla yanaşmasından, səriştəli pedaqoq, səmimi, qayğıkeş bir insan kimi universitet kollektivinin dərin hərmətini qazanmasından danışdı, yubilyarı təbrik edərək, ona uzun ömür və fəaliyyətində uğurlar arzuladı.
Xəzər Universitetinin rektoru Hassan Niknafs, Akademik işlər üzrə prorektor Məhəmməd Nuriyev, İdarəetmə və tələbə işləri üzrə prorektor İsaxan İsaxanlı, “Dünya” məktəbinin təsisçisi Nailəxanım İsayeva, Humanitar və sosial elmlər fakültəsinin dekanı Cabir Xəlilov, baş müəllim Firəngiz Nəsirova, İctimai əlaqələr və media üzrə direktor Əlövsət Əmirbəyli də yubilyara öz təbriklərini və ürək sözlərini çatdırdılar..
Tədbirin sonunda Roza Arazova yubiley tədbirinin təşkilinə görə universitet rəhbərliyinə və iştirakçılara təşəkkürünü bildirdi.