2017-ci il aprelin 12-də Xəzər Universiteti Azərbaycan dili və ədəbiyyatı departamentinin təşəbbüsü ilə Nizami rayonu 328 nömrəli məktəbinin yuxarı sinif şagirdlərinin universitetlə tanış olması məqsədilə “Açıq qapı günləri” çərçivəsində tədbir keçirildi.

Məktəblilər departamentlər, dərs otaqları, laboratoriyalar və kitabxana ilə tanış olduqdan sonra “Mərmər” zalda universitetin təqdimatı ilə bağlı videoçarxı izlədilər.

Daha sonra Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı universitet, ixtisaslar, təhsil şərtləri və s. barədə şagirdlərə məlumat verdi, onların suallarını cavablandırdı. Tədbirin sonunda məktəbin direktoru Asif Nəbiyev univeritetin rəhbərliyinə, şəxsən Hamlet İsaxanlıya və tədbirin təşkilatçılarına göstərdikləri diqqət və qonaqpərvərliyə görə təşəkkürünü bildirərək, Xəzər Universiteti ilə məktəb arasında əlaqələrin daha da sıxlaşdırılması və genişləndirilməsi ilə bağlı arzularını bildirdi.