Azərbaycan Respublikası Dövlət Miqrasiya Xidməti və Xəzər Universitetinin təşkilatçılığı ilə 2017-ci il fevralın 17-də universitetin Neftçilər kampusunun  Mərmər salonunda Dövlət Miqrasiya Xidmətinin 10 illiyi münasibətilə “Azərbaycanda miqrasiya siyasəti: nailiyyətlər və inkişaf perspektivləri” mövzusunda elmi-praktik konfrans keçirildi.

Tədbirdə Xəzər Universitetinin, Dövlət Miqrasiya Xidmətinni (DMX), dövlət qurumlarının, ölkədə fəaliyyət göstərən beynəlxalq və qeyri-hökumət təşkilatlarının nümayəndələri, Milli Elmlər Akademiyasının, ali təhsil müəssisələrinin elmi əməkdaşları və xarici ekspertlər iştirak edirdilər.

Konfrans DMX-nin keçdiyi inkişaf yolunu əks etdirən qısametrajlı filmin nümayişi ilə başlandı. Sonra Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı konfransı açaraq, müzakirə olunan mövzunun mühümlüyünü və əhəmiyyətini nəzərə çatdırdı. O, həmçinin, iştirakçılara Xəzər Universiteti haqqında da qısa məlumat verdi.

DMX rəisinin müavini Pərviz Musayev çıxışında xidmətin yaranma tarixi, fəaliyyət istiqamətləri, 10 il ərzində əldə edilən uğurlar və nailiyyətlər barədə konfrans iştirakçılarını ətraflı məlumatlandırdı.

BMT-nin Qaçqınlar üzrə Ali Komissarlığının (QAK) Azərbaycandakı nümayəndəsi Furio de Angeles, Beynəlxalq Miqrasiya Təşkilatının (BMqT) Azərbaycandakı nümayəndəliyinin rəhbəri Serhan Aktoprak çıxış edərək, miqrasiya probleminin mühüm cəhətlərindən söz açdılar.

Universitetin İqtisadiyyat və menecment departamentinin müdiri Ceyhun Məmmədov Xəzər Universitetinin Miqrasiya Araşdırmaları Mərkəzi haqqında təqdimatla çıxış etdi.

Açılış mərasimindən sonra elmi-praktik konfransın plenar iclasında ölkə və  xarici mütəxəssislərin üç mövzunu – “Miqrasiya siyasəti və insan hüquqları”, “Qaçqınlar və sığınacaq axtaran şəxslərin beynəlxalq himayəsi” və “Qloballaşma dövründəmiqrasiya prosesləri: çağırışlar və cavab tədbirləri” mövzularını əhatə edən           məruzələri  dinlənildi. 

Vahid Qəhrəmanov, Azər Allahverənov, Xəyalə Abbasova, Nazim Salmanov, Gülgün Babayeva, İslam Hidayətov, Cəmil Hüseynov (DMX), Ronald Sketdon (İngiltərədəki Sasseks və Niderlanddakı Maastrixt universitetləri), Meltem Ersan (BMqT), Fuad Cabbarov (Əmək və Əhalinin Sosial Müdafiəsi Nazirliyi), Roland Hosner (MSIBM Tədqiqat Bölməsi), Turan Cahangirova (Ombudsman aparatı), Rima Məmmədova, Sevinc Şəfiyeva (Xəzər Universiteti), Mətləb Mahmudov (AMEA Fəlsəfə İnstitutu), Rövşən Kərimov, Zakir Eminov (AMEA Coğrafiya İnstitutu), Rəna  Ağamirova (Gənclər və İdman Nazirliyi), Qərib Əsgərov (Dövlət Sərhəd Xidməti Akademiyası) və Rafiq Nəcəfquliyev (DİN Polis Akademiyası) hazırladıqları elmi məruzələri konfransa təqdim etdilər.

Məruzələr ətrafında müzakirələrdən sonra elmi-praktik konfransın işinə yekun vuruldu və qətnaməsi qəbul olundu.

Tədbir ölkə mediasında geniş işıqlandırılmışdır:

http://azertag.az/xeber/Dovlet_Miqrasiya_Xidmeti_terefinden_71_mine_yaxin_sexsin_Azerbaycan_vetendasligina_mensubiyyeti_taninib-1036064;

http://www.azerbaijan-news.az/index.php?mod=3&id=116141;

http://www.itv.az/index.php/az/tele/doevlaet-migrasiya-khidmaetinin-yarad-lmas-n-n-10-illiyinae-haesr-olunan-konfrans  və s.