2017-ci il yanvarın 24-də Mərakeş Krallığının Azərbaycan Respublikasındakı səfiri cənab Mohamed Adil Embarch Xəzər Universitetində oldu və universitet rəhbərliyi ilə görüşdü. Xəzər Universitetin “Neftçilər” korpusunda baş tutan bu görüşdə səfiri birinci müşaviri cənab Anis Zaidi müşaiət edirdi. Görüşdə Xəzər Universitetinin təsisçisi, Dirketorlar və Qəyyumlar Şurasının sədri professor Hamlet İsaxanlı, rektor Hassan Niknafs, Tədris işləri üzrə prorektor professor Məhəmməd Nuriyev, Humanitar və sosial elmlər fakültəsinin dekanı Cabir Xəlilov, Təhsil fakültəsinin dekanı Elza Səmədova, Siyasi elmlər və beynəlxalq əlaqələr departamentinin müdiri Muxtar Hacızadə və Beynəlxalq əlaqələr şöbəsinin direktoru Turan Cəfərova iştirak edirdilər.

Səfir təmsil etdiyi ölkə, Azərbaycan-Mərakeş əlaqələri, iki ölkənin adət-ənənələri arasında oxşarlıqlardan danışdı. Daha sonra Turan Cəfərova Xəzər Universiteti haqqında qısa təqdimatla çıxış edərək, universitetin tarixi, Azərbaycanda və ondan kənarda reytinq sistemlərində yeri, fakültələr, təklif olunan proqramlar, universitetin beynəlmilələşdirmə siyasəti və s. haqqında məlumat verdi. Professor H.İsaxanlı Mərakeş səfirliyi, eləcə də, Mərakeş universitetləri ilə yaxın əməkdaşlıqda maraqlı olduqlarını bildirdi.

Görüşdən sonra nahar verildi.