2016-cı il dekabrın 23-ü saat 10:00-dan 17:00-dək Xəzər Universitetində Azərbaycan Prezidenti yanında Gənclər Fondunun dəstəyi, Xəzər Universitetinin Tarix və arxeologiya departamenti və Xəzər Universiteti Karyera İnkişaf Mərkəzinin əməkdaşlığı ilə “Elm şənliyi” adlı tədbir keçirildi. Tədbirin əsas məqsədi elmi incəsənət yolu ilə gənclərə göstərmək və sevdirmək idi.
Tədbiri Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı açdı. Daha sonra AMEA Arxeologiya və Etnoqrafiya İnstitutunun direktoru professor Maisə Rəhimova və Misir Ərəb Respublikasının Azərbaycandakı Səfirliyi Misir Mədəniyyət və Təhsil Əlaqələri Mərkəzinin nümayəndəsi Dr. Əhməd Sami Elaylı çıxış etdilər.
Tədbirdə Xəzər Universiteti ilə yanaşı, Azərbaycan Dövlət İqtisad Universiteti, Bakı Qızlar Universiteti, Bakı Dövlət Universiteti, Dövlət İdarəçilik Akademiyası, Azərbaycan Dövlət Pedaqoji Universiteti, Azərbaycan Dövlət Pedaqoji Universitetinin Şamaxı Filialı, MİRAS İctimai Birliyi, Misir Mədəniyyət Mərkəzi, Qala Qoruğu, Qobustan Qoruğu, Tarix Muzeyi, Arxeologiya və Etnoqrafiya İnstitutu kimi bir sıra ali təhsil müəssisələri və qurumlar iştirak edirdi.
Tədbir sərginin nümayişi ilə başladı. Xəzər Universitetinin tələbələri və digər məktəb, universitet və qurumların nümayəndələri öz əl işlərini gələn qonaqlara nümayiş etdirdilər. Daha sonra ümumi təbiət, humanitar, texniki və canlı təbiət mövzularında elmi-kütləvi seminarlar keçirildi. Sərgi çərçivəsində AMEA-nın Arxeologiya və Etnoqrafiya İnstitutunun doktoru, Qobustan Milli tarix bədii qoruğunun elmi katibi Rəhman Abdullayev “ Qayaüstü təsvirlərin sənədləşdirilməsində 3D metodunun tətbiqi” mövzusunda təqdimat apardı. Təqdimatın ardınca Xəzər Universitetinin qızlardan ibarət rəqs ansamblının orjinal tarixi rəqslərinə yer verildi. Daha sonra Xəzər Universitetinin Mühəndislik və tətbiqi elmlər fakültəsinin tələbələri Sevinc Səfərova, Orxan İsmayılov və Fazil Xəlilov “Alternativ enerji və onun faydaları” adlı təqdimat apardılar və bunu təcrübə şəklində gələn qonaqlara nümayiş etdirdilər. Sərginin sonlarına yaxın universitetlərarası Qədim Şərqin tarixi, coğrafiyası, mədəniyyəti və ədəbiyyatı üzrə intellektual yarış keçirildi. Qaliblərə xüsusi mükafatlar verildi.
Tədbirin sonunda bütün iştirakçılara, təşkilatçılara diplom və sertifikatlar təqdim olundu, xatirə şəkilləri çəkildi.