2016-cı il dekabrın 3-də Müslüm Maqomayev adına Azərbaycan Dövlət Filharmoniyasında Azərbaycan Respulikası Mədəniyyət və Turizm Nazirliyi, TÜRKSOY, Xəzər Universiteti, Azərbaycan Müəlliflər Birliyinin birgə təşkillatçılığı və Xəzər Universitetinin Kamera orkestrinin iştirakı ilə “Türkdilli dövlətlərin müstəqilliyinin 25-ci ildönümünə həsr edilmiş qala konsert” keçirildi. Konsertdə Xəzər Universitetinin rəhbərliyi və əməkdaşları, Azərbaycan, Qazaxıstan, Qırğızıstan, Özbəkistan, Türkmənistan, Tatarıstan, Başqırdıstan respublikalarının bəstəkarları və musiqişünasları, Azərbaycanın millət vəkilləri, ali təhsil ocaqlarının rəhbərləri, icra hakimiyyətlərinin rəhbər işçiləri, ictimaiyyət nümayəndələri və media mınsubları iştirak edirdilər.
Konsertin başlanğıcında Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı və Azərbaycan Milli Konservatoriyasının prorektoru, musiqişünas, professor Lalə Hüseynova çıxış edərək, tədbirin türk xalqlarının musiqi sənətinin nümayişi baxımından böyük əhəmiyyət daşıdığını vurğuladılar.
Konsertdə Üzeyir Hacıbəyli, Qara Qarayev, Arif Məlikov, Xəyyam Mirzəzadə, Fərhad Bədəlbəyli, Samir Əliyev, Kərəm Əkbər (Azərbaycan), Rəşid Kalımullın (Tatarıstan), Muradbəy Beqalıyev (Qırğızıstan), Turğay Erdener (Türkiyə), Balnur Kıdırbek, Yerulan Kanapyanov, Həbibulla Setekov (Qazaxıstan), Rövşən Nepesov (Türkmənistan) və Leyla İsmaqılovanın (Başqırdıstan) kamera instrumental əsərləri ifa olundu. Konsertdə, həmçinin, Sərdar Fərəcovun Hamlet İsaxanlının sözlərinə bəstələdiyi iki vokal lövhə Azərbaycanın əməkdar artisti Fəridə Məmmədovanın ifasında səsləndi. Balnur Kıdırbek və Həbibulla Setekovun fortepiano və kamera orkesti üçün bəstələnmiş əsərləri pianoçu Zülfiyyə Sadıqovanın ifasında səsləndi. Əsərləri ifa olunmuş xarici bəstəkarlar konsertdə iştirak edirdilər.
Qeyd edək ki, beynəlxalq miqyaslı tədbirlərdə çıxış etmək təcrübəsi olan Xəzər Universitetinin Kamera orkestri universitetin Musiqi və İncəsənət departamentinin müdiri, pianoçu, dosent Zülfiyyə Sadığovanın bədii rəhbərliyi ilə fəaliyyət göstərir, orkestrin qala konsertinin dirijoru Cavad Tağızadə idi.