Dekabrın 3-də Xəzər Universitetinin Mərmər salonunda (“Neftçilər” kampusun) “Türk ölkələrində müasir akademik musiqi: inkişafı və perspektivləri” mövzusunda beynəlxalq konfrans keçirildi. Azərbaycan, Qazaxıstan, Qırğızıstan, Özbəkistan, Türkmənistan respublikalarının bəstəkar və musiqişünaslarının iştirakı ilə keçirilən tədbir TÜRKSOY, Xəzər Universiteti və Azərbaycan Müəlliflər Birliyi tərəfindən təşkil olunmuşdu.
Tədbirdə TÜRKSOY, Xəzər Universiteti və Azərbaycan Müəlliflər Birliyinin rəhbərliyi və əməkdaşları, media mənsubları iştirak edirdilər.
Konfransın başlanğıcında Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı qonaqları salamlayaraq, konfransın mövzusu ilə əlaqədar qısa çıxış etdi. O, həmçinin bildirdi ki, universitetin Elmi Şurası türk xalqlarının mədəniyyətinin inkişafında töhfələrinə görə TÜRKSOY-un Baş katibi, professor Düsen Kaseinova Xəzər Universitetinin Fəxri doktoru adının verilməsi haqqında qərar qəbul etmişdir və sözü rektor Hassan Niknafsa verdi. H. Niknafs D. Kaseinov haqqında qısa məlumat verəndən sonra fəxri doktor diplomunu ona təqdim etdi. D. Kaseinov bu şərəfə layiq görüldüyü üçün Xəzər Universitetinin rəhbərliyinə təşəkkürünü bildirdi və çıxış etdi.
Sonra Azərbaycan Müəlliflər Birliyinin sədri İsmayıl Məmmədkərimovun moderatorluğu ilə konfrans öz işinə başladı. Azərbaycan Bəstəkarlar İttifaqının katibi, musiqişünas, professor Zemfira Qafarova, Azərbaycan Milli Konservatoriyasının prorektoru, musiqişünas, professor Lalə Hüseynova, Qazaxıstan Bəstəkarlar İttifaqının katibi Balnur Kıdırbek və qazaxıstanlı bəstəkar Həbibulla Setekovun məruzələri dinlənildi. Məruzələr ətrafında müzakirələr aparılmaqla konfrans işini bitirdi.