2016-cı il noyabrın 18-də Xəzər Universitetinin şəhər mərkəzindəki kampusunda “Dünya” konsert salonunda Robert Hossein və Türkan Şoray ilə görüş keçirildi. Görüşdə Xəzər Universitetinin tələbələri, “Dünya” məktəbinin şagirdləri və media qurumlarının nümayəndələri iştirak etdilər.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı tədbiri açaraq, Robert Hossein və Türkan Şorayın həyat və fəaliyyətləri, həmçinin Avrasiya Akademiyasının fəaliyyətləri haqqında danışdı.

Görüşün birinci hissəsində Robert Hossein və Türkan Şoray ürək sözlərini dedilər, müsahibə verdilər. İkinci hissəsində isə Xəzər Universiteti və “Dünya” məktəbinin musiqili kollektivlərinin hazırladığı konsert verildi. Sonra isə tələbələr və şagirdlərin iştirakı ilə ingilis dramaturqu Uiliyam Şekspirin həyat və yaradıcılığına həsr olunmuş tamaşa səhnədə göstərildi.

Robert Hosseinin həyat yoldaşı Michele Hossein iştirakçılara və təşkilatçılara xüsusi təşəkkür etdi.