Xəzər Universitetinə Fulbright proqramı çərçivəsində 2106-2017-ci təhsil ilində yerli ingilis dili müəllimlərinə yardım edəcək Mr. James Millar adlı yeni ingilis dili müəllimi qoşuldu.
James Millar beynəlxalq əlaqələr üzrə bakalavr dərəcəsini Miçiqan Dövlət Universitetindən almışdır. O, burada, eyni zamanda, rus dili, Avrasiyaşünaslıq və beynəlxalq inkişaf üzrə də təhsil almışdır. Daha sonra orada iki illik bir müddətdə Avropa, rus dili və Avropaşünaslıq mərkəzində eləcə də, islamşünaslıq proqramı üzrə tədqiqat assistenti kimi çalışmışdır. James Millar Azərbaycan, Türkiyə, Şri-Lanka, Hindistan və Latviyada da müxtəlif akademik proqramlarda iştirak etmişdir.
Hazırda James Millarin Xəzər Universitetindəki fəaliyyətinin əsas hissəsini İngilis dili və ədəbiyyatı departamentində çalışan və ingilis dilini tədris edən müəllimlərə dərsdə və dərsdənkənar yardım etmək təşkil edir. Millar, eyni zamanda, ingilis dilində danışıq klubuna da rəhbərlik edir. Yaxın gələcəkdə James Millar mədəniyyətlərarası anlaşmanı daha da inkişaf etdirmək və ingilis dili bacarıqlarının inkişafına töhfə vermək üçün müxtəlif formalı mədəniyyət tədbirləri və seminarlar keçirməyi planlaşdırır.
Fulbright ABŞ Dövlət departamenti tərəfindən maliyyələşdirilən və ABŞ-ın Bakıdakı səfirliyi tərəfindən idarə olunan proqramdır. Proqram universiteti yeni bitirən məzunlara xaricdə ingilis dilini qeyri-ingilisdilli tələbələrə tədris edən müəllimlərə yardım etməyə imkan verir. Bu proqram çərçivəsində ingilis dilini tədris edən şəxslər həm də ABŞ-ın “mədəniyyət səfirləri” rolunda çıxış edirlər.