2016-cı il oktyabrın 6-7-də Xəzər Universiteti Tarix və arxeologiya departamentinin müəllimi Araz Aslanlı Ankara şəhərində keçirilən “Müstəqilliyinin 25-ci ilində Türk respublikaları” adlı beynəlxalq simpoziumda iştirak etmişdir.
Tədbirin təşkilatçıları və dəstəkçiləri arasında Ahmet Yesevi Universiteti, Türk Keneşi, Beynəlxalq Türk Akademisi, TÜRKPA, TÜRKSOY, TİKA, Türk Tarix Qurumu, Ankara Siyasi və İqtisadi Araşdırmalar Mərkəzi də yer alırdı.
Tədbirin açılış panelində Türkiyə Prezident Aparatı sədrinin müavini və Prezidentin Mətbuat katibi İbrahim Kalın, Azərbaycan, Qazaxıstan, Qırğızıstan, Özbəkistan və Türkmənistan respublikalarının Türkiyədəki səfirləri, Türkiyə Prezidentinin Baş müşaviri Yalçın Topçu, Türk Mədəniyyəti və İrsi Fondunun prezidenti Günay Əfəndiyeva və digərləri çıxış etmişlər.
Tarix və arxeologiya departamentinin müəllimi Araz Aslanlı, tədbirdə “Qarabağ probleminin həll olunmamasının səbəbləri və nəticələri” adlı məruzə ilə çıxış etmişdir. Məruzədə Qarabağ probleminin yaranmasının və həll olunmadan qalmasının səbəbləri izah edilmiş, problemin Azərbaycan, region və dünya üçün yaratdığı mənfi nəticələr və risklər barədə məlumat verilmişdir.