2016-cı il sentyabrın 26-dan 28-dək Erasmus+ çərçivəsində həyata keçirilən NIZAMI layihəsi ilə bağlı ikinci görüş Azərbaycanın və Avropa Birliyinin partnyor universitetləri, eləcə də, Azərbaycan Respublikası Təhsil Nazirliyi nümayəndələrinin iştirakı ilə İsveçin Uppsala şəhərində baş tutdu. Xəzər Universiteti görüşdə universtetinin təsisçisi, Direktorlar və Qəyyumlar Şurasının sədri professor Hamlet İsaxanlı, Biologiya elmləri departamentinin rəhbəri Dr. İradə Xəlilova ilə təmsil olunurdu. Görüşə Uppsala Universiteti ev sahibliyi edirdi.

Üç günlük görüş ərzində NIZAMI layihəsində tərəfdaş olan universitetlərin nümayəndələri təqdimatlarda iştirak edərək, layihənin gedişi barəsində müzakirələr apardılar.

Uppsalada olanda Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı Uppsala universitetinin prorektoru Eva Akesson, beynəlxalq ofisin məsul şəxsləri ilə görüşdü. Görüşdə Xəzər Universiteti ilə Uppsala Universiteti arasında qarşılıqlı əməkdaşlıq ideyaları müzakirə olundu, müzakirələri davam etdirmək qərara alındı.