Tarix və arxeologiya departamentinin müəllimi Nəsiman Yaqublu “Məhəmməd Əmin Rəsulzadə əsərləri (mühacirət dövrü: Türkiyə, 1922-1929)” kitabını çapa hazırlamışdır. Oxuculara təqdim olunan bu kitabda müəllifin 1920-ci illərdə yazdığı əsərlər toplanmışdır. Kitabda Azərbaycanın tarixi, müstəqillik mübarizəsi, 1918-1920-ci ildə mövcud olmuş Azərbaycan Xalq Cümhuriyyəti haqqında geniş məlumatlar vardır. Eyni zamanda, müəllif bu əsərlərində sovet rejiminin işğalçı mahiyyətini, xalqları əsarətdə saxlayan, onları azadlıqdan məhrum edən siyasətini kəskin tənqid edir.
Kitabdan Azərbaycan və XX əsr tarixini araşdıran tədqiqatçılar, siyasətçilər, diplomatlar, mətbuat təmsilçiləri ciddi faydalana bilərlər.