Keçən tədris ilində Xəzər Universitinin bakalavr pilləsini fərqlənmə diplomu (yüksək fəxri diplom) ilə bitirmiş Afaq Əhmədova  magistr təhsilini Fransada  Eyfel proqramı (Eiffel Program) çərçivəsində davam etdirəcəkdir. Eyfel proqramı Fransa Xarici İşlər Nazirliyi tərəfindən təsis olunmuş və əla tədris göstəricilərinə malik olan  ən yaxşı  xarici tələbələrin Fransanın ən yüksək təhsil institutlarında magistr və PhD pillələrində təhsil almaları üçün nəzərdə tutulur.

Afaq Əhmədova Bakının Nərimanov rayonundakı 207 nömrəli tam orta məktəbi əla qiymətlərlə bitirdikdən sonra qəbul imtahanlarında 620 bal toplayaraq, Xəzər Universitetinin İqtisadiyyat və menecment fakultəsinə daxil olmuşdu. Oxuduğu müddət ərzində Erasmus Mundus proqramı çərçivəsində bir il İtaliyanın nüfuzlu təhsil ocağı olan Venesiyadakı Ka-Foskari Universitetində (Ca-Foscari University of Venice) təhsilini davam etdirmiş və yüksək göstəricilərə nail olmuşdur. Hal-hazırda  o, Fransanın Klermont-Ferrand (Clermont-Ferrand) şəhərindəki Overn Universitetində (The University of Auvergne) magistr təhsilini davam etdirir.

Məzunumuzu bu münasibətlə  ürəkdən təbrik edir və ona daha böyük uğurlar arzulayırıq.