İyunun 9-da  Xəzər Universitetinin Mərkəz kampusunun konsert salonunda Musiqi və incəsənət departamentinin təşkilatçılığı ilə tələbələrdən ibarət rəqs ansamblının universitetin 25 illiyinə həsr olunmuş növbəti solo konserti oldu. Konsertdə universitetin rəhbərliyi, əməkdaşları, tələbələri, valideynlər iştirak edirdilər. Xalq artistləri Roza Cəlilova, Cəmilə Bayramova, əməkdar artist Xanlar Bəşirov tədbirin qonaqları idilər. Müslüm Maqomayev adına Azərbaycan Dövlət Filarmoniyasının Mahnı və Rəqs Ansamblı da Xəzər Universitetini təbrik etməyə gəlmişdi.

Musiqi və incəsənət departamentin müdiri dosent Zülfiyyə Sadıqovanın giriş sözündən sonra  Müslüm Maqomayev adına Azərbaycan Döövlət Filarmoniyasının Mahnı və Rəqs Ansamblı (bədii rəhbər  xalü artisti professor Ağaverdi Paşayev, baletmeyster xalq artisti Cəmilə Bayramova, solist və quruluşçu ansamblın solisti, Xəzər Universitetinin müəllimi Telman Əliyev) tədbiri açaraq, “Qazağı” rəqsini ifa etdi.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı  çıxış edərək, universitetdə ötən illər ərzində təhsillə yanaşı musiqi və incəsənət sahəsində görülmüş işlərdən danışdı, xalq artisti Cəmilə Bayarmova və əməkdar artist Xanlar Bəşirovun xidmətlərini xüsusi vurğuladı.

Universitetin rəqs ansamblının fəaliyyətini əks etdirən slayd  və videomateraillar nümayiş olundu.

Xalq artisti Cəmilə Bayramova və əməkdar artist Xanlar Bəşirov  “Naz eləmə”, universitetin məzunu Zərinə Təhməzova “Qavalla rəqs” rəqslərini ifa etdilər.

Sonra universitetin müəllimi Səbinə İsmayıova və əməkdar artist Telman Əliyevin rəhbərlik etdikləri rəqs ansamlının konserti oldu. Tələbələr Azərbaycan milli rəqslərini, müasir rəqsləri ifa etdilər. Ustad rəqqasların və tələbələrin ifalarə tamaşaçılar tərəfindən alğışlarla qarşılandı.

Xalq artisti Roza Cəlilova çıxıç edərək, tələbə rəqqasların konsertini yüksək qiymətləndirdi, universiteti 25 illik yubileyi münasibətilə təbrik etdi.

Sonda konsert iştirakçıları səhnəyə dəvət edilərək, tamaşaçılara təqdim olundular və onlara gül dəstələri verildi.