2016-cı il mayın 25-də Macarıstanın Karoly Robert College Universitetinin nümayəndələri iki universitet arasında əməkdaşlıq qurmaq üçün Xəzər Universitetində oldular. Görüş universitetin “Neftçilər” kampusunda baş tutdu.

Karoly Robert College Universitetinin nümayəndələri Beynəlxalq əlaqələr və Erasmus üzrə koordinator Zsuzsanna Busa və Turizm, Regional İnkişaf və Xarici Dillər İnstitutunun rəhbəri və eyni zamanda, biznes və menecment üzrə tədris proqramları və beynəlxalq tədbirlər üzrə məsul şəxs Dr. Zoltán Bujdosó idilər. Xəzər Universitetini rektor Dr. Hassan Niknafs, İqtisadiyyat və menecment departamentinin rəhbəri Ceyhun Məmmədov və Beynəlxalq əlaqələr şöbəsinin direktoru Turan Cəfərova təmsil edirdilər. Tərəflər birgə təlim proqramları və təhsil layihələri, tələbələr, akademik və administrativ heyət üçün mübadilə proqramları və ikidərəcəli proqramlar yaradılmasında öz maraqlarını ifadə etdilər. İlkin olaraq, iqtisadiyyat, biznes menecmenti və administrasiyası sahələrində bakalavr və magistr dərəcələri üzrə əməkdaşlığı başlamaq və daha sonra isə bunu digər sahələrdə davam etdirmək qərara alındı. Erasmus+ proqramı çərçivəsində əməkdaşlıq da müzakirə olundu. Görüşün sonunda əməkdaşlıq müqaviləsi imzalandı.

Qonaqların universitetə səfəri çərçivəsində tələbələr üçün təqdimat da planlaşdırılmışdı. Dr. Zoltán Bujdosó Karoly Rober College haqqında təqdimat keçirdi və tələbələr üçün təklif olunan beynəlxalq proqramlardan danışdı. Zsuzsanna Busa Macarıstan hökuməti tərəfindən 2013-cü ildə yaradılan Stipendium Hungaricum Təqaüd Proqramı çərçivəsində Macarıstanda mövcud olan təqaüd imkanları haqqında məlumat verdi. Proqramın əsas məqsədi Macarıstana gələn əcnəbi tələbələrin sayını artırmaq və macar ali təhsil müəssisələrini ən yaxşı əcnəbi tələbələri öz universitetlərinə cəlb etməkdə dəstəkləməkdir. Təqdimat sual-cavab sessiyası ilə bitdi.