Aprelin 26-da Xəzər Universitetində görkəmli şair, nasir, publisist, tarix tədqiqatçısı Teyyub Qurbanın tərtib etdiyi “На имя Багирова, за подписью Багирова” (“Bağırovun adına, Bağırovun imzası ilə”) adlı kitabın təqdimat mərasimi olmuşdur. Mərasimdə ölkənin müxtəlif ali təhsil və elm ocaqlarında çalışan alim və mütəxəssislər, Xəzər Universitetinin əməkdaşları iştirak edirdilər.

Tədbirin aparıcısı – Azərbaycan Rüspublikasının Prezidenti yanında Dövlət İdarəçilik Akademiyasının kafedra müdiri, tarix elmləri üzrə fəlsəfə doktoru, dosent Firdovsiyyə Əhəmdova   Teyyub Qurbanın 20 il ərzində Mir Cəfər Bağırovun fəaliyyətini arxiv sənədləri əsasında tədqiq etdiyini, bunun  nəticəsi olaraq üzərində çalışdığı çoxcildliyin  “Düşmənlərindən güclü şəxsiyyət” adı ilə artıq üç cildinin çapdan çıxdığını və bir neçə dəfə təkrar nəşr olunduğunu, oxuculara təqdim edilən kitabın isə  fərqli nəşr olduğunu   iştirakçıların nəzərinə çatdırdı.

Kitabın redaktoru və ön sözün müəllifi, əməkdar jurnalist Əlirza Balayev çıxışında bildirdi ki, təqdimatı keçirilən kitab Teyyub Qurbanın öz əsərlərində istifadə etdiyi arxiv sənədlərindən ibarətdir və oxuculara heç bir çərh və izahat olmadan təqdim edilir ki, bu da hər kəsə tanış olduğu sənədlər əsasında öz rəyini formalaşdırmaq imkanı verir.

Mərasimdə kitabın hazırlanması və çapının təşəbbüskarı Faiq Həbibov, Mir Cəfər Bağırov nəslinin nümayəndəsi Məmmədtağı Bağırov, Azərbaycan Respublikası  Prezidentinin İşlər İdarəsinin Siyasi Sənədlər Arxivinin şöbə müdiri, tarix elmləri üzrə fəlsəfə doktoru Lalə Hüseynova, Xəzər Universiteti Avrasiya və Orta şərq Araşdırmaları mərkəzinin direktoru, AMEA akdemik Ziya Bünyadov adına  Şərqşünaslıq İnstitutunun Ərəb ölkələri tarixi və iqtisadiyyatı şöbəsinin müdiri Fərda Əsədov, AMEA A. A. Bakıxanov adınaTarix İnstitutunun aparıcı elmi işçisi, tarix elmləri üzrə fəlsəfə doktoru Əzizağa Ələkbərov, Azərbaycanın sabiq baş naziri Rəhim Hüseynov və digərləri çıxış edərək, Teyyub Qurbanın Mir Cəfər Bağırova həsr olunmuş əsərləri haqqında fikir və mülahizələrini söyləmişlər.

Sonda aparıcı F. Əhmədova təqdimat mərasimimnin təşkilinə gərə Xəzər Universitetinin rəhbərliyinə və iştirakçılara təşəkkürünü bildirmişdir.