Xəzər Universitetinin rektoru dosent İradə Xəlilova və Həyat elmləri departamentinin əməkdaşlarının dəvətilə İranın Royan İnstitutunun alimləri –Tədqiqat işləri üzrə direktor müavini Dr. Parvanə Əfşari, Təhsil üzrə direktor müavini Dr. Ruhullah Fəthi və Beynəlxalq şöbənin əməkdaşı Vəhid Asgəri 2020-ci il fevralın 17-18-də universitetdə oldular. Royan İnstitutunun əsas elmi istiqaməti kök hüceyrə texnologiyaları vasitəsilə xəstəliklərin müalicəsi, sonsuzluq problemlərinin aradan qaldırılması və klonlaşdırma texnologiyalarının tətbiqidir. Bu institutun ən önəmli nailiyyətlərindən biri Yaxın Şərqdə ilk dəfə olaraq bir çox heyvanların, o cümlədən, qoyunun və keçinin klonlaşdırılmasıdir.
Royan İnstitutunun əməkdaşları iki gün müddətində Xəzər Universiteti ilə gələcək əməkdaşlıq, o cümlədən, kök hüceyrə texnologiyası haqqında birgə elmi konfransların, elmi-tədqiqat layihələrinin həyata keçirilməsi, ikitərəfli magistr və doktorantların yetişdirilməsi haqqında ətraflı müzakirələr apardılar. Qonaqlar universitetin bir sıra laboratoriya və departamentlərində görüşlər keçirdilər, o cümlədən, İngilis dili və ədəbiyyatı departamentinin müdiri Dr. Bahman Amani ilə geniş fikir mübadiləsi apardılar. Görüşlərin nəticəsi olaraq, yaxın zamanda Mustafa mükafatının qalibi olan professor Baharvənd tərəfindən Xəzər Universitetində təlim kursunun həyata keçirilməsi nəzərdə tutuldu.
Qeyd edək ki, 2019-cu ildə Royan İnstitutunun əməkdaşı professor Baharvənd 500 min ABŞ dolları dəyərində Mustafa mükafatının (Mustafa Prize) qaliblərindən biri olmuşdur və bu böyük tədbirə Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı və universitetin rektoru dosent İradə Xəlilova rəsmi dəvət olunmuşdular. Professor Hamlet İsaxanlı mükafatların təqdim olunması mərasimində səhnəyə dəvət olunmuş və qaliblərə mükafatların təqdim olunmasında iştirak etmişdi.
Qonaqlar Xəzər Universiteti ilə elmi sahədə əməkdaşlıq edən və ortaq memorandumu olan Azərbaycan Elmi Tədqiqat Baytarlıq İnstitutuna da səfər etdilər, oranın maddi-texniki bazası ilə, aparılan elmi tədqiqat işləri ilə tanış oldular və alimlərlə ətraflı müzakirələr apardılar. Eyni zamanda, qonaqlar “Dünya” məktəbinə səfər edərək, oranın tədris fəaliyyəti ilə yaxından tanış olmaqla, məktəb şagirdlərinin stimullaşdırılması və keçirilən mövzuları daha yaxşı mənimsəmək üçün qurulan laboratoriyalarla tanış oldular.
Səfərin sonunda Royan İnstitutunun qonaqlarına Xəzər Universitetinin rektoru dosent İradə Xəlilova tərəfindən hədiyyələr təqdim edildi.