Azərbaycan Respublikası Müdafiə Nazirliyi Milli Müdafiə Universitetində 2026-cı il 3-5 noyabr aralığında  "8 Noyabr – Zəfər Günü"nün 6-cı ildönümünə həsr olunmuş "Müdafiə və milli təhlükəsizliyin aktual problemləri" mövzusunda respublika elmi-praktik konfransı keçirilib. Konfransda Xəzər Universiteti Tarix və arxeologiya departamentinin müəllimi tarix üzrə fəlsəfə doktoru Nigar Camalova "Rəqəmsal yaddaşın müdafiəsi: Süni intellekt mühitində Azərbaycan tarixi" mövzusunda məruzə ilə çıxış edib. Məruzədə süni intellektin sürətlə inkişaf etdiyi müasir dövrdə rəqəmsal təhlükəsizlik və koqnitiv (idrak) müdafiənin strateji prioritetə çevrildiyi diqqətə çatdırılıb. Süni intellekt mühitində milli tarixin qorunmasının strateji əhəmiyyətini vurğulayan Nigar Camalova Azərbaycan tarixinin süni intellektə inteqrasiyası üçün tarixi materialların elmi ekspertizadan keçirilməsini, xarici dillərdə etibarlı məlumatların internetdə artırılmasını və bu məlumatların Sİ mühitinə daxil olunmasını təklif edib.