8 Noyabr – Zəfər Günü münasibətilə Xəzər Universitetinin Tarix və arxeologiya departamenti  cari həftəni “Zəfər həftəsi” elan edib.

Həftə ərzində departamentin müəllimləri tarix dərslərində Azərbaycanın 44 günlük Vətən müharibəsi və tarixi Zəfərinə xüsusi yer ayırıb. Hər bir dərsin 10–15 dəqiqəsi bu mövzuya həsr olunaraq, tələbələrlə müharibənin gedişi, Azərbaycan Ordusunun qəhrəmanlığı və Ali Baş Komandan İlham Əliyevin həyata keçirdiyi siyasi-diplomatik fəaliyyət barədə söhbətlər aparılıb. 44 gün ərzində Azərbaycan əsgərinin göstərdiyi cəsarət, yenilməz iradəsi və xalqımızın nümayiş etdirdiyi birlik haqqında məlumat verilib. Eyni zamanda, qazanılan Zəfərin yalnız hərbi uğur deyil, həm də uzun illər davam edən mübarizənin, siyasi iradənin və milli həmrəyliyin nəticəsi olduğu vurğulanıb.

Dərslər yalnız məlumatlandırma ilə məhdudlaşmayıb. Tələbələr də müharibə ilə bağlı öz düşüncə və təəssüratlarını bölüşüb, həmin dövrdə yaşadıqları hisslərdən, qələbə sevincindən və Zəfərin onlar üçün ifadə etdiyi mənadan danışıblar. Qarşılıqlı fikir mübadiləsi şəraitində keçən bu söhbətlər tələbələrə Azərbaycanın müasir tarixində xüsusi yer tutan hadisələri bir daha xatırlamaq və dəyərləndirmək imkanı yaradıb.