Beynəlxalq Münasibətlərin Təhlili və Multikulturalizm Mərkəzi (BMTMM) və Bakı Kitab Mərkəzinin birgə təşkilatçılığı ilə 2026- cı il noyabrın 3- də  “Qarabağ uğrunda müharibə: strategiya, texnologiya və qələbə” (The War for Karabakh: Strategy, Technology, and Victory) kitabının təqdimat mərasimi keçirilib. Mərasimə Azərbaycan Respublikası Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev də qatılıb.

Tədbirdə Xəzər Universitetinin Siyasi elmlər və fəlsəfə departamentinin müdiri dos. Orxan Vəliyev də iştirak edib. Həmin departamentin müəllimi, BMTMM-in departament rəhbəri Dr. Vasif Hüseynov isə tədbirin təşkilatçılarından biri kimi mərasimdə olub.

ABŞ Ordusunun ehtiyatda olan polkovniki Liam Collins və mayoru John Spencer tərəfindən qələmə alınan kitabda  Azərbaycanın 44 günlük Vətən müharibəsində əldə etdiyi qələbənin hərbi-strateji aspektlərini, müasir texnologiyaların tətbiqini və qələbəyə təsir edən siyasi, iqtisadi və hərbi amillər təhlil edilir. Təxminən iki il ərzində hazırlanmış tədqiqat Qarabağ münaqişəsinin tarixi köklərindən başlayaraq, 44 günlük Vətən müharibəsinin əsas əməliyyatlarını və 2023-cü ildə həyata keçirilmiş antiterror tədbirlərini əhatə edir. Müəlliflər araşdırma çərçivəsində hərbi və mülki mütəxəssislərdən  müsahibələr alıb, döyüşlərin baş verdiyi ərazilərdə tədqiqatlar aparıblar.

Link: “Qarabağ uğrunda müharibə: strategiya, texnologiya və qələbə” kitabının təqdimat mərasimi keçirilib