Xəzər Universiteti Siyasi elmlər və fəlsəfə departamentinin təşkilatçılığı ilə 2025-ci il dekabrın 2-də Khazar Talks-2 layihəsi çərçivəsində növbəti akademik seminar keçirilmişdir. Qeyd edək ki, Khazar Talks ilk dəfə 2024-2025-ci tədris ilində Siyasi elmlər və fəlsəfə departamenti tərəfindən həyata keçirilməyə başlanmışdır. Bu layihə çərçivəsində səfirlərlə görüşlər, akademik seminarlar və kitab təqdimatları təşkil olunması planlaşdırılır.

Tədbir Xəzər Universitetinin Mərmər salonunda Türkiyə Respublikasının Azərbaycandakı Fövqəladə və səlahiyyətli səfiri Prof. Birol Akgünün iştirakı və Xəzər Universiteti Tarix və arxeologiya departamentinin müəllimi Dr. Odər Əlizadənin moderatorluğu ilə baş tutmuş, universitetin rəhbərliyi, professor-müəllim heyəti və tələbələr tərəfindən maraqla izlənmişdir.

Proqram Azərbaycan və Türkiyənin dövlət himnlərinin ifası ilə açılmışdır. Xəzər Universitetinin rektoru Dr. Raziyə İsayeva tədbir iştirakçılarını salamlayaraq, müasir dünyadakı siyasi dəyişikliklər və türk birliyinin bu proseslərdəki rolundan bəhs etmişdir.

Seminarın əsas məruzəçisi Prof. Birol Akgün “Qlobal nizamın dəyişməsi və Türkiyə” mövzusunda geniş çıxış edərək, iştirakçıları  Türkiyənin bu dəyişikliklərdəki yeri haqqında məlumatlandırmışdır. Seminardan sonra Prof. Akgün, auditoriyanın müxtəlif suallarını cavablandırmışdır.

Tədbirin sonunda, Xəzər Universitetinin rektoru Dr. Raziyə İsayeva tərəfindən Prof. Birol Akgünə universitetin xatirə hədiyyəsi təqdim edilmişdir. Seminar qonaqların birgə xatirə fotosu çəkilməsi ilə sona çatmışdır.