2025-cı il sentyabrın 25-26-da Xəzər Universitetində “Türk Dünyasının Memarlıq İrsi” adlı beynəlxalq konfrans keçirildi. Tədbir  universitetin Memarlıq və dizayn departamentinin təşəbbüsü ilə, Türkiyə Mədəniyyət və Turizm Nazirliyi, Xəzər Universitetinin Tarix və arxeologiya departamenti, Səlcuq Universiteti, Bakı Mühəndislik Universiteti və İqtisadi İnkişaf və Sosial Tədqiqatlar İnstitutunun (İKSAD) əməkdaşlığı ilə təşkil olundu.

 Konfransda Türkiyənin 12, Azərbaycanın 5 universiteti, həmçinin Ukrayna, Pakistan, Rumıniya, Vyetnam, İndoneziya, Banqladeş, Gürcüstan və Slovakiyadan 11 universitetin professor və müəllim heyəti iştirak etdi. Sessiyalar həm üz-üzə, həm də onlayn formatda keçirildi.

Xəzər Universiteti Memarlıq və dizayn departamentinin müdiri Dos. Şəhla Abbasova açılış nitqində konfransın məqsədini belə ifadə etdi:
“Bu gün biz burada yalnız zəngin memarlıq irsimizi öyrənmək üçün deyil, həm də onu qoruyub yaşatmaq, müasir dövrün tələblərinə uyğun şəkildə dəyərləndirmək və gələcəyin memarlığı ilə vəhdət içində inkişaf etdirmək məqsədilə toplaşmışıq. İnanıram ki, konfrans fikir və təcrübə mübadiləsi üçün əlverişli platforma olacaq.”

Konfransın açılışında Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı, universitetin rektoru Dr. Raziyə İsayeva çıxış edərək, tədbirin əhəmiyyətini vurğuladılar. Onlar bildiriblər ki, memarlıq irsi yalnız tikili və abidələrdən ibarət deyil, həm də xalqın yaddaşını, kimliyini və dünyagörüşünü özündə əks etdirən mədəni sərvətdir. Bu cür tədbirlər isə ortaq türk kimliyinin tanıdılmasına və gələcək nəsillərə ötürülməsinə böyük töhfə verir.

Konfransda, həmçinin, Türkiyə Mədəniyyət və Turizm Nazirliyinin Koordinator müavini Kürşat Özdemir, Xəzər Universiteti Tarix və arxeologiya departamentinin müdiri dosent Telman Nüsrətoğlu, Bakı Mühəndislik Universitetinin Memarlıq və şəhərsalma kafedrasının müdiri Prof. Sabir Orucov, Səlcuq Universitetindən Prof. Dr. İlham Enveroğlu, Necmettin Erbakan Universitetindən Prof. Dr. Ahmet Çaycı, Marmara Universitetindən Dos. Mehdi Genceli, Konya Texniki Universitetindən Prof. Dr. Bilgehan Yılmaz məruzələrlə çıxış ediblər.

Tədbir çərçivəsində memarlıq və şəhərsalmanın müxtəlif aspektlərinə dair elmi müzakirələr aparılıb, iştirakçı universitetlər arasında əməkdaşlığın genişləndirilməsi istiqamətində yeni imkanlar nəzərdən keçirilib.

Nəticə olaraq, Türk dünyasının memarlıq irsi sadəcə keçmişin yadigarı deyil, həm də gələcəyin yol xəritəsidir. Bu irs təkcə daş və kərpicdən ibarət tikililərdə deyil, eyni zamanda ortaq mədəni yaddaşımızda, kimliyimizdə və dünyagörüşümüzdə yaşayır. Onu araşdırmaq, qorumaq və müasir dövrün tələblərinə uyğun şəkildə inkişaf etdirmək həm elmi, həm də mədəni borcumuzdur. Gələcək nəsillərə ötürüləcək ən böyük sərvətlərdən biri məhz bu zəngin memarlıq irsidir və onun davamlılığı Türk dünyasının birliyini, gücünü və mədəniyyətinin dərinliyini daha da möhkəmləndirəcəkdir.

https://www.youtube.com/watch?v=RVlKEmmUirI