2025-ci il mayın 13-16-da Bakı Ekspo Mərkəzində Xəzər regionunun kənd təsərrüfatı və qida sənayesi sahəsində ən böyük sərgisi – 18-ci Azərbaycan Beynəlxalq Kənd Təsərrüfatı Sərgisi -  Caspian Aqro təşkil edilmişdir. Bu sərgi Azərbaycanın aqrar-sənaye kompleksində mütərəqqi texnologiyaların tətbiqi, kənd təsərrüfatı sahəsinin yerli və xarici mütəxəssisləri arasında təcrübə mübadiləsi və qarşılıqlı faydalı işgüzar əlaqələrin gücləndirilməsi üçün bazarda praktiki vasitə kimi özünü doğrultmuşdur.

Caspian Aqro sərgisi Azərbaycan Respublikası Kənd Təsərrüfatı Nazirliyinin təşkilati dəstəyi ilə keçirilir. Sərgi, həmçinin, Azərbaycan Respublikasının Qida Təhlükəsizliyi Agentliyi, Kiçik və Orta Biznesin İnkişafı Agentliyi, İxracın və İnvestisiyaların Təşviqi Agentliyi, Sahibkarlar (İşəgötürənlər) Təşkilatları Milli Konfederasiyası, BMT-nin Ərzaq və Kənd Təsərrüfatı Təşkilatı, Azərbaycan Sərgi Təşkilatçıları Assosiasiyası tərəfindən dəstəklənir. 

Xəzər Universitetinin Baytarlıq təbabəti departamentinin tələbələri koordinator Çiçək Əliyeva və fənn müəllimlərinin rəhbərliyi altında sərginin müxtəlif günlərində iştirakçı qismində kənd təsərrüfatına aid stendlərlə yaxından tanış olmuş, həmçinin, baytarlıq sahəsi üzrə müxtəlif bilgilər əldə etmişlər.