Azərbaycanın xalq artisti Fidan Hacıyevanın II Beynəlxalq Opera Festivalının (23-29 aprel) növbəti konserti 2025-ci il aprelin 28-də Xəzər Universitetində keçirilib.”Operanın gələcəyi, yeni nəfəs” adlı konsertdə gənc vokalçılar - Azərbaycan Milli Konservatoriyası və Azərbaycan Dövlət Tibb Universitetinin tələbələri Xəzər Universiteti Kamera orkestrinin (bədii rəhbər universitetin Musiqi və incəsənət departamentinin müdiri, əməkdar müəllim, pianoçu Zülfiyyə Sadıqova) müşayiəti ilə Azərbaycan və dünya opera və operetta sənətindən nümunələr, mahnı və romanslar ifa etmişlər.
Beynəlxalq müsabiqələr laureatı Aydın Süleymanov və Nurlana Əsgərova Üzeyir Hacıbəylinin “Arşın mal alan” operettasından Telli və Vəli duetini oxumuşlar. Rəhim Xəlilov, Ayan Bayramova, Ruslan Persan, Şəms Cəfərova, Asim Muradov, Anar Həmidli, Regina Məcidova və digərləri də çıxış ediblər. Fidan Hacıyeva fransız bəstəkarı Jorj Bize`nin “Karmen” operasından “Habanera” ariyasını səsləndirib.

Konsertin sonunda Fidan Hacıyeva tələbələri ilə birgə Müslüm Maqomayevin “Azərbaycan” mahnısını ifa edib.

Fidan Hacıyevanın II Beynəlxalq Opera Festivalı aprelin 29-da Müslüm Maqomayev adına Azərbaycan Dövlət Filarmoniyasında “Viva Opera” qala-konserti ilə başa çatıb.