2025-ci il mayın 12-də Xəzər Universiteti Konfrans və İstirahət Mərkəzinin Buzovnadakı "İnci Hotel"- də İqtisadiyyat və menecment fakültəsinin Turizm işinin təşkili ixtisası üzrə təhsil alan 4-cü kurs tələbələri üçün informasiya-təcrübə sessiyası təşkil edildi.

Tədbiri "İnci Hotel"-in geniş təcrübəyə malik əməkdaşı Cabir Feyzullayev etdi. O, müəssisənin fəaliyyəti, strateji idarəetmə prinsipləri və xidmət standartları haqqında ətraflı məlumat verdi,  karyera inkişafı prosesində əldə etdiyi peşəkar təcrübələri və sektordakı uğur faktorlarını tələbələrlə bölüşdü.

İnteraktiv sessiya ərzində tələbələr sahəyə dair aktual suallar verərək, müzakirələrdə fəal iştirak etdilər. Onlar otelçilik sənayesində nəzəri biliklərin praktiki tətbiqi, müştəri məmnuniyyətinin təmin edilməsi strategiyaları və müasir otel idarəçiliyinin incəlikləri barədə dəyərli məsləhətlər aldılar.

Tədbirdə İqtisadiyyat və menecment fakültəsinin dekanı Dr. Raziə İsaeva çıxış edərək, turizm sektorunda nəzəri biliklərlə praktiki təcrübənin inteqrasiyasının əhəmiyyətindən danışdı və otel rəhbərliyinə dəstəkləri üçün təşəkkürünü bildirdi.

Nəzəri hissə başa çatdıqdan sonra tələbələr üçün otelin infrastrukturu və xidmət zonalarına dair ətraflı  ekskursiya təşkil olundu.