Xəzər Universiteti Səudiyyə Ərəbistanında fəaliyyət göstərən bir sıra beynəlxalq məktəblərdə təqdim olunmuşdur. Universitetin beynəlxalq əlaqələr üzrə müşaviri Prof. Əhməd Sami Elaydi bu məqsədlə Səudiyyə Ərəbistanına səfər etmiş və 2025-ci il aprelin 13-16-da müxtəlif məktəblərdə təqdimatlar keçirmişdir.

Həmin məktəblər arasında Rovad əl-Farabi Beynəlxalq Məktəbləri (Rawad Al-Farabi International Schools) və Al-Elm Beynəlxalq Məktəbi (Al-Elm International School) də olmuşdur.

Səfər çərçivəsində Prof. Əhməd Sami adıçəkilən məktəblərin rəhbərliyi və müəllim heyəti ilə görüşlər keçirmiş, həmçinin şagirdlərlə də birbaşa ünsiyyət qurmuşdur. Görüşlər zamanı o, Azərbaycanın zəngin mədəniyyəti və tarixi haqqında qısa məlumat verməklə yanaşı, Xəzər Universitetini əhatəli şəkildə təqdim etmişdir.

Şagirdlər üçün keçirilən təqdimat zamanı  universitetin yaranma tarixi, strukturu və təhsil imkanları barədə geniş məlumat verilmişdir. Qeyd olunmuşdur ki, Xəzər Universiteti Azərbaycanın müstəqillik qazandıqdan sonra yaradılan ilk özəl ali təhsil müəssisəsidir və bu baxımdan ölkənin ali təhsil tarixində mühüm yer tutur. Universitetdə tədris dili ingilis dilidir və bu, beynəlxalq tələbələr üçün əlverişli təhsil mühiti yaradır.

Təqdimatda universitetin bakalavriat, magistratura və doktorantura səviyyələrində təqdim etdiyi müxtəlif ixtisaslar barədə də məlumat verilmiş, təqaüd imkanları, tələbələr üçün kampus həyatı və beynəlxalq əməkdaşlıq proqramları vurğulanmışdır. Eyni zamanda, tələbələrə Xəzər Universitetinin məzunlarının uğurları və dünya universitetləri ilə əməkdaşlıq əlaqələri barədə də məlumatlar çatdırılmışdır.

İştirakçılar bu təqdimatlara böyük maraq göstərmiş və Azərbaycan, xüsusilə də Xəzər Universiteti haqqında təqdim olunan məlumatları məmnuniyyətlə qarşılamışlar. Şagirdlər və məktəb rəhbərliyi universitetin təqdimatını yüksək qiymətləndirmiş, gələcəkdə əməkdaşlıq və tələbələrin Xəzər Universitetində təhsili imkanları ilə maraqlandıqlarını bildirmişlər.

Bu təşəbbüs Xəzər Universitetinin beynəlxalq tanınmasını artırmaq, ərəb ölkələri ilə akademik əməkdaşlığı genişləndirmək və beynəlxalq tələbələrin cəlb olunması istiqamətində atılan əhəmiyyətli addımlardan biridir.