ELM VƏ TƏCRÜBƏ BAKIDA GÖRÜŞDÜ.

01 May 2025-ci il tarixində Xəzər Universitetində baş tutan tədbirdə Xəzər Universiteti ilə Hasvet Anonim Şirkəti arasında baytarlıq təbabəti üzrə təhsil, klinik fəaliyyət və elmi-tədqiqat sahəsində birgə əməkdaşlığa dair müqavilə imzalanmışdır. Müqavilənin məqsədi qarşılıqlı razılaşmalar əsasında birgə fəaliyyət nəticəsində Baytarlıq Təbabəti Fakültəsi və Klinikasının qurulması, eyni zamanda kadr potensialının gücləndirilməsi ilə tələbə hazırlıq səviyyəsinin yüksəldilməsidir.

Hasvet Anonim Şirkəti 1996-cı ildə Türkiyənin Antalya şəhərində yaradılmış və daha sonra fəaliyyət sahəsini genişləndirərək heyvan sağlamlığı üzrə qabaqcıl şirkətlərdən birinə çevrilmişdir. Şirkət baytarlıq dərmanlarının istehsalı, tibbi avadanlıqların satışı, proqram təminatı, ev heyvanları üçün yem istehsalı və baytarlıq klinikalarının layihələndirilməsi kimi sahələr üzrə fəaliyyət göstərir. Eyni zamanda, şirkət təlim və seminarlar vasitəsilə baytarlıq sahəsində akademik və peşəkar dəstək xidmətləri də göstərməkdədir.

Görüşdə Xəzər Universitetinin Təsisçisi, Direktorlar və Qəyyumlar Şurasının sədri Prof.Hamlet İsaxanlı, Akademik işlər üzrə prorektoru Prof. Məhəmməd Nuriyev, o cümlədən dekan və mərkəz rəhbərləri, qarşı tərəfdən isə Hasvet Anonim Şirkətinin direktoru DVM/MBA Hidayet Şimşek başda olmaqla, şirkətin idarə heyəti iştirak etmişdir.