2025-ci il mayın 1-də Kaspi liseyinin 10 və 11-ci sinif şagirdləri Xəzər Universitetinin Neftçilər kampusunda oldular. Səfərin məqsədi şagirdləri universitet həyatı, ixtisaslar və gələcək təhsil imkanları haqqında  məlumatlandırmaq  idi.

Mərmər salonda keçirilən tədbirdə  universitetin İqtisadiyyat və menecment fakültəsinin dekanı Dr. Raziyə İsayeva və Tələbə cəlbi üzrə işçi qrupunun assistenti Nüşabə Alıyeva çıxış edərək, universitet haqqında geniş məlumat verdilər.  Karyera və Məzunlar Mərkəzinin direktoru Zərifə Əliyeva çıxışında düzgün karyera seçiminin vacibliyindən və Xəzər Universitetinin bu istiqamətdə verdiyi dəstəkdən danışdı.

Çıxış edənlər və Xəzər Universiteti Tələbə Məclisinin prezidenti Ənvər Bədəlov və sədri Hüseyn Dadaşov şagirdlərin suallarını cavablandırdılar. Sonra şagirdlər universitetin kitabxanası və bir sıra laboratoriyalarla  tanış oldular.