Fəaliyyətə başladığı 1998-ci ildən 22000 şagirdin təhsil aldığı, 1600-ə yaxın məzunu olan və hal- hazırda 2000-dən artıq şagirdin təhsillə təmin edilməsində müstəsna xidmətləri olan “Dünya” məktəbi əsrin dörddə birini təntənə ilə qeyd etdi. “Dünya” məktəbi 1998-ci ildə Prof. Hamlet İsaxanlı və onun ömür-gün yoldaşı Nailəxanım İsayeva tərəfindən təsis olunub. Məktəbin nəşri oan “Dünya” dərgisinin də 10 yaşı tamam olub.

2025-ci il aprelin 25-də Səməd Vurğun adına Azərbaycan Dövlət Rus Dram Teatrında baş tutan yubiley tədbirində ölkənin ziyalı ictimaiyyəti, elm və sənət adamları, dövlət rəsmiləri, media mənsubları, müxtəlif məktəb direktorları, diplomatik korpusun nümayəndələri, xarici qonaqlar və qardaş Türkiyə universitetclərindən nümayəndələr iştirak edirdilər.

Tədbirin aparıcıları – “Dünya” məktəbinin müəllimləri Arzu Ömərova və Elşad Rzayev məktəbin keçdiyi inkişaf yolu, fəaliyyəti, şagirdləri, eyni zamanda, bu gün ölkəmizdə və  ölkəmizin hüdudlarından kənarda təhsil alan, çalışan  məzunları haqqında geniş söz açdılar. Xüsusilə vurğuladılar ki, Azərbaycan Respublikası Prezidenti  İlham Əliyevin 6 avqust 2013-cü il tarixli Sərəncamı ilə Xəzər Universitetinin “Dünya” məktəbi 2012/2013-cü dərs ilində keçirilmiş “Ən yaxşı ümumtəhsil məktəbi” müsabiqəsinin qalibi olmuşdur.

Qeyd olundu ki, “Dünya” məktəbi Azərbaycan-rus, “Dünya” IB məktəbi və “Dünya” ana məktəbindən ibarətdir. Məktəbin Sumqayıt və Gəncə şəhərlərində yerləşən filiallarının da uğurlu fəaliyyəti barədə bəhs edildi.

2002-ci ildə yaradılmış “Dünya” ana məktəbində təhsil alan azyaşlılar sonradan “Dünya” məktəbinin ibtidai bölmələrində oxuyurlar. Məktəb indiyədək 2250 nəfər şagird hazırlayaraq, 1-ci sinfə yola salıb və hazırda151 nəfər şagirdi mövcuddur.

Yaranmasının 15 illiyini qeyd edən “Dünya” IB məktəbinin 286 nəfər məzunu olub. Hazırda IB bölməsində 953 nəfər şagird təhsil alır. 2025-ci ildə IB məzunları ölkəmizdəki universitetlərlə bərabər Standford, Boston, Oksford, London universitetlərində də təhsil alacaqlar.

2016-cı ildən fəaliyyətə  baılayan Sumqayıt “Dünya” məktəbində hazırda 416 nəfər şagird təhsil alır. Məzunları EGE Universiteti, Hong Kong Universiteti, Xəzər Universiteti, Eskişehir Osmanqazi Universiteti, Karlsuhe Texnologiya Universiteti kimi ali təhsi ocaqlarında təhsillərini davam etdirirlər.

 2021-ci ildə “Dünya” məktəbi özünün Gəncə şəhərində filialını təsis edib. Hazırda məktəbin 170 nəfər şagirdi var.

Tədbirdə Xəzər Universiteti və “Dünya” məktəbinin təsisçisi Prof.Akad. Hamlet İsaxanlı,  AMEA-nın prezidenti, Akad. İsa Həbibbəyli,  Millət vəkili Azay Quliyev, “Dünya” məktəbinin 2010-cu il məzunu,  Azərbaycan Elm və Təhsil Nazirliyinin rəsmisi, II Qarabağ Müharibəsinin qazisi Niftalı Qasımlı, Dünya Məktəbinin 2009-cu  il məzunu, Vyana Universiteti Bisnes analiz departamentinin doktorantı və müəllimi Ülkər Qaracalı, məktəbin İB bölməsinin 11-ci sinif şagirdi - “Sabahın alimləri” adlı Respublika Layihə müsabiqəsinin qalibi olarar qızıl medala laiq görülmüş İbrahim Allahverdiyev “Dünya” məktəbinin cəmiyyətdəki rolundan, təhsil sahəsindəki uğurlarından danışdılar. Qeyd olundu ki, “Dünya” məktəbi elə Xəzər Universistetinin özü kimi rəqabətə davamlı bir təhsil müəssisəsi olaraq özünü cəmiyyətdə isbat edib. Təhsil sahəsində məktəbin reytinqi həmişə yüksək olub. Bu, aydın şəkildə görünür. Ona görə də, özəl sektorda orta məktəblər xeyli dərəcədə genişlənsə də, “Dünya” məktəbi öz zirvəsində dayanır.

Tədbirdə “Dünya” məktəbində uzun illər fəaliyyət göstərən əməkdaşlar təşəkkürnamələr və hədiyyələrlə təltif olundular. Sonda çıxış edən “Dünya” Məktəbi MMC-nin direktoru Aygün İsayeva bütünlükdə pedaqoji heyətə və həmkarlara ürək sözlərini dedi, bütün əməkdaşları təbrik etdi.

Yubiley tədbiri geniş konsert proqramı ilə müşayiət olundu. “Dünya” məktəbinin bütün filiallarında təhsil alan şagirdlər və “Dünya” ana məktəbinin balacalardan ibarət rəqs qrupu, Gaga Band musiqi qrupu, Xəzər Universitetinin Kamera orkestri müxtəlif musiqi nömrələri ilə çıxış etdilər.