2025-ci il aprelin 13-də “Gələcəyini Qur!” layihəsinin iştirakçıları olan 10 və 11-ci sinif şagirdləri ilə universitetin Mərmər salonunda görüş keçirildi.

Tədbir “Gələcəyini Qur!” Layihəsinin həmtəsisçisi Bəhruz Hidayətzadə və Xəzər Universitetinin İqtisadiyyat və menecment fakültəsinin dekanı Raziyə İsayevanın çıxışları ilə başladı. Dillər və Ədəbiyyatlar departamentinin müəllimi Ülvi Babasoy universitet haqqında təqdimatla çıxış etdi və abituriyentlərin suallarını cavablandırdı. Layihənin ötən illərinin məzunları -  hazırda Xəzər Universitetində müxtəlif ixtisaslarda təhsil alan gənclər çıxış edərək, tələbə həyatları haqqında təəssüratlarını bölüşdülər.

Təbdirin ikinci hissəsi Xəzər Universitetinin məzunu, millət vəkili Ceyhun Məmmədovun çıxışı ilə başladı. “Gənclər gələcəklərini necə qurmalıdırlar?” adlı çıxışda natiq sağlam həyat tərzi, sağlam düşüncə, şəxsi inkişaf və digər mövzulara dair gənclərə tövsiyələrini verdi. Raziyə İsayeva süni intellektin inkişafı və onun liderliyə təsirindən danışdı. İnteraktiv keçən bu çıxışda gənclər insanlar və maşınlar arasında iş bölgüsü və münasibətlər haqqında sual-cavabda iştirak etdilər. Xəzər İnnovasiyalar Mərkəzinin koordinatoru,  Kömpüter elmləri departamentinin müəllimi Fariz Həsənli informasiya texnologiyaları sahəsində yeni trend və peşələr haqqında məlumat verdi.

Abituriyentlər, həmçinin, Kitabxana İnformasiya Mərkəzində və Nanotexnologiyalar laboratoriyasında oldular, onlar üçün konsert təşkil edildi.