2023-2025-ci illər üzrə İsveç Kənd Təsərrüfatı Elmləri İnstitutu tərəfindən qalib elan edilən SORG4NOBAL beynəlxalq elmi-tədqiqat layihəsinin yekun tədbiri Azərbaycanda keçirilmişdir. Tədbirdə Xəzər Universitetinin Həyat elmləri departamentinin müdiri Dr. Cəmalə Eldarova və departamentin dosenti Dr. Cavid Ocaqi iştirak etmiş, layihənin əldə etdiyi nəticələr, sorqo bitkisinin kənd təsərrüfatı və ekosistemlərə töhfəsi müzakirə olunmuşdur.

Tədbir 2025-ci il martın 11-12-də keçirilmişdir. Seminarın 1-ci günü “Təbiət əsaslı həllər və aqroekologiya”ya həsr olunmuş və Radisson hotelində baş tutmuşdur. Seminar Cavid Ocaqinin “Xəzər Universitetində təbiət əsaslı həllər” mövzusunda məruzəsi ilə başlamışdır. Həmçinin, İsveç Kənd Təsərrüfatı Universitetinin əməkdaşı və eyni zamanda layihə rəhbəri Dr. Məhbubjon Rahmatov, Litvanın Kənd Təssərüfatı və Meşəçilik Tədqiqat Mərkəzinin əməkdaşları Dr. Rita Amoniene və Dr. Monika Toleikiene, Estoniya Kənd Təsərrüfatı Araşdırmaları və Bilik Mərkəzinin əməkdaşı Dr. Priit Pechter, Ukraynanın Bitki Seleksiyası və Genetika İnstitutu – Milli Toxum və Genotip Tədqiqat Mərkəzinin əməkdaşı Dr. Olena Yarmolska, İsveçin Orqanik Kənd Təsərrüfatı Fermerləri Assosiasiyasının nümayəndəsi Josefine Johansson və Lund Universitetinin tələbəsi Habiba Allam məruzə etmişlər.

Tədbirin 2-ci günu “Təbiət əsaslı həllər və dayanıqlı şəhərlər”ə həsr olunmuş, Xəzər Universitetinin Mərmər zalında keçirilmişdir. Lund Universitetindən Bernadett Kiss, ADA Universitetindən Fidan Namazova, FAO-dan İradə Qaraxanova, ADİU-dan Elmira Fərzəliyeva və Göyçay Peşə Təhsili Mərkəzindən Əzizağa Atakişiyevin məruzələri dinlənilmişdir.. Həmçinin, seminar çərçivəsində layihə icraçıları Azərbaycan Respublikası Elm və Təhsil Nazirliyi Genetik Ehtiyatlar İnstitutuna da (GEİ) səfər edərək, institutun baş direktoru, AMEA-nın müxbir üzvü professor Zeynal Əkpərov ilə görüşmüş,  institutda aparılan elmi-tədqiqat işləri, Milli Genbank və Mərkəzi Məlumat Bazası haqqında məlumat əldə etmişlər.

Yekun görüşə İsveç, Estoniya, Ukrayna, Litva və Azərbaycandan olan tədqiqatçılarla yanaşı, fermerlər, FAO, ADA Universiteti və Kənd Təsərrüfatı Nazirliyinin əməkdaşları da qatılmışlar. Layihənin əsas məqsədi iqlim dəyişikliklərinə davamlı sorqonun introduksiyası vasitəsilə evtrofikasiya və pestisid çirklənməsinin azaldılması, eləcə də qida təhlükəsizliyi və ekoloji dayanıqlığın artırılması olub.

Tədbirdə, həmçinin, yeni beynəlxalq əməkdaşlıq imkanları və gələcək layihələrin icrası müzakirə edilib.. Mütəxəssislər davamlı kənd təsərrüfatı təcrübələri, aqrar biomüxtəlifliyin artırılması, fermerlərin maarifləndirilməsi və sorqonun bioenerji, yem və insan qidası kimi istifadəsinin genişləndirilməsi ilə bağlı təkliflər irəli sürdülər.

Bu görüş Təbiətə Əsaslanan Həllər (Nature-based Solutions) çərçivəsində yeni yanaşmaların inkişaf etdirilməsi və “2030 Dayanıqlı İnkişaf Strategiyaları”na uyğun olaraq, iqlim dəyişikliyi, biomüxtəlifliyin qorunması və kənd təsərrüfatının dayanıqlılığına dair inteqrasiya olunmuş həllərin işlənib hazırlanması istiqamətində mühüm addım olmuşdur.