2025-ci il martın 12-də Bakı Dövlət Universitetində (BDU) Türkiyə Cümhuriyyətinin müstəqillik simvolu olan Milli Marşın qəbul edilməsi və Mehmet Akif Ersoyun anım günü münasibətilə tədbir keçirilib. BDU və Bakı Yunus Əmrə İnstitutunun təşkilatçılığı ilə reallaşan tədbirdə universitetin prorektoru Prof. Fərda İmanov çıxışında Azərbaycan-Türkiyə münasibətlərinin qardaşlıq və dostluq prinsiplərinə əsaslandığını vurğulayıb.

Universitetin Şərqşünaslıq fakültəsinin dekanı Aydan Xəndan  Mehmet Akif Ersoyun  İstiqlal Marşı ilə daim xatırlandığını qeyd edib. Bakı Yunus Əmrə İnstitutunun rəhbəri Güvən Çolak “Anadolu ilə Xəzərin əli bir-birini sıx tutur, sərhədlərə baxmayaraq, könül dostluğu həmişə qalır, buna görə də hər iki ölkənin insanları bir-birinə “qardaş” deyə xitab edir”,- deyə bildirib. Türkiyəli yazıçı Beşir Ayvazoğlu, türkoloq, Prof. Elman Quliyev tədbirdə çıxış ediblər.

 Xəzər Universiteti Tarix və arxeologiya departamentinin müdiri Dos. Telman Nüsrətoğlu  "Türkiyənin  milli mübarizə tarixi və Mehmet Akif  Ersoy"  mövzusundakı geniş məruzəsində İstiqlal Marşının tarixi, bədii və siyasi əhəmiyyətindən danışaraq, onun istiqlal mübarizəsini əks etdirən dəyərli əsər olduğunu vurğulayıb.

Tədbirin sonunda BDU-nun Filologiya fakültəsinin tələbələri Türk ədəbiyyatına məxsus şeirləri səsləndiriblər.