2025-ci il martın 7-də Xəzər Universiteti Karyera və Məzunlar Mərkəzinin təşkilatçılığı ilə Xəzər Universitetinin Neftçilər, Nərimanov və Bakıxanov korpuslarında AIESEC Azərbaycan təşkilatı tərəfindən Universitetin tələbələri üçün İnfodesk təşkil olunmuşdur.

AIESEC təşkilatının məqsədi beynəlxalq və yerli təcrübə proqramları vasitəsilə gənclərin liderlik, satış, marketinq, layihə idarəetməsi, maliyyə, insan resursları kimi bir çox sahədə olan bacarıqlarını üzə çıxarmaq və inkişaf etdirməkdir.

AIESEC Azərbaycan 3 mübadilə proqramı həyata keçirir: “Global Volunteer” (Qlobal Könüllü), “Global Teacher” (Qlobal Müəllim) və “Global Talent” (Qlobal İstedad). Artıq 17 ildir ki, AIESEC Azərbaycan təşkilatı minlərlə gənci mübadilə proqramları vasitəsilə xaricə göndərərək və xaricdən qəbul edərək Azərbaycan cəmiyyətinin inkişafında aktiv şəkildə iştirak edir.

Görüş zamanı Lokal komitə üzrə marketinq və ictimaiyyətlə əlaqələr üzrə direktor Jalə Zeynalzadə, marketinq meneceri Aysu Həmzəyeva, layihə meneceri Ruslan Cabbarov və digərləri təşkilatın həyata keçirdiyi mübadilə proqramları haqqında tələbələrə ətraflı məlumat verdilər, onları maraqlandıran sualları cavablandırdılar.