2025-ci il martın 4-5-də Naxçıvan Dövlət Universitetində (NDU) “Konstitusiya və Suverenlik İli”nə həsr olunan “İnklüziv Təhsil: Nailiyyətlər və Qarşıda Duran Vəzifələr” mövzusunda I Respublika Elmi Konfransı təşkil edilmişdir. Konfrans inklüziv təhsilin inkişafını müzakirə edən və bu sahədə atılan addımları dəyərləndirən əhəmiyyətli bir platforma olub. Tədbir ölkənin müxtəlif ali təhsil müəssisələrinin, o cümlədən Azərbaycan Dövlət Pedaqoji Universiteti, Bakı Slavyan Universiteti və Xəzər Universitetinin birgə təşkilatçılığı ilə həyata keçirilmişdir. Konfransa Naxçıvan Muxtar Respublikası Təhsil Nazirliyi və Əmək və Əhalinin Sosial Müdafiəsi Nazirliyi də dəstək göstərmişdir.

Konfransın açılışında Xəzər Universitetin Humanitar, təhsil və sosial elmlər fakültəsinin dekan vəzifəsini icra edən Aygün Verdiyeva “İnklüziv təhsil xüsusiyyətləri” mövzusunda əhatəli məruzə ilə çıxış etmişdir. O, inklüziv təhsilin tətbiqində qarşıya çıxan çətinliklər və bu sahədə qarşıda duran hədəflər barədə müzakirələr aparmışdır.

Tədbir çərçivəsində Xəzər Universitetinin digər nümayəndələri də inklüziv təhsilin müxtəlif aspektlərinə dair çıxış etmişlər. Universitetin müəllimi Aynur Abdullayeva “Sağlamlıq imkanları məhdud kiçik yaşlı məktəblilərin cəmiyyətə adaptasiyası üçün Polşa təcrübəsinin tətbiqi” mövzusunda  məruzə  etmiş və bu sahədəki beynəlxalq təcrübələrdən necə istifadə oluna biləcəyini vurğulamışdır.

Tədbirin sonunda NDU İnklüziv Təhsil Mərkəzinin açılışı baş tutmuşdur. Mərkəzin direktoru, pedaqogika üzrə fəlsəfə doktoru, dosent Taleh Xəlilov mərkəzin məqsədləri və fəaliyyət istiqamətləri barədə məlumat verərək, burada xüsusi qayğıya ehtiyacı olan tələbələr üçün təlim dəstəyi və reabilitasiya şəraiti yaradıldığını qeyd etmişdir.

Konfransın yekununda tədbirin təşkilatçıları və tərəfdaş universitetlərə təşəkkür plaketləri təqdim edilmiş, iştirakçılar NDU-nun Texnologiya Mərkəzində tələbələr tərəfindən hazırlanmış əl işləri ilə tanış olmuşlar.