2025-ci il fevralın 27-də Xəzər Universitetinin təşkilatçılığı, Azərbaycan Sahibkarlar Konfederasiyası, Azərbaycan-Türkiyə İş Adamları Birliyi, Müstəqil Sənayeçi və İş Adamları Dərnəyi və Energazer şirkətinin dəstəyi ilə universitetin Mərmər salonunda “Biznes və Elm: Akademik Biliklərin Sənaye və İnnovasiyada Tətbiqi üzrə I Forum” keçirildi. Tədbirdə iştirakçı qurumların, digər təşkilat və şirkətlərin rəhbərləri, sahibkarlar və tibb mütəxəssisləri iştirak edirdilər.

Tədbirin əsas məqsədi elmi tədqiqatçılarla sənaye nümayəndələrini bir araya gətirərək, elmi biliklərin iqtisadiyyata inteqrasiyasını müzakirə etmək idi.

Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı universitetlərin yaranma tarixi, cəmiyyətə verdiyi töhfələr, müasir dövrdə universitetlərin tədqiqat mərkəzlərinə çevrilməsi mövzusunda geniş məruzə etdi. Bildirdi ki, akademik biliklər yalnız universitet divarları arasında qalmamalıdır, əksinə, onlar real iqtisadiyyat və sənaye sahələrində tətbiq edilərək, innovasiyaların yaranmasına səbəb olmalıdır.

Energazer şirkətinin təsisçisi və rəhbəri Süleyman Məcidli Xəzər Universiteti ilə Azərbaycanın bir neçə qabacıl iş adamlarının birgə səyi nəticəsində yeni yaradılmış “Xəzər Universiteti Biznes Sənaye Klubu (KUBIC)”, onun məqsədləri və missiyası barədə çıxış etdi.  O, universitet-biznes-sənaye üçgəninin əhəmiyyətini, akademik biliklərin sənayedə tətbiqinin təşviqini, universitet-sənaye əməkdaşlığının gücləndirilməsini və startap mühitinin dəstəklənməsini vurğuladı. Həmçinin, bacarıqlı və savadlı tələbələrin müəyyən edilib iş dünyasına təqdim olunmasının vacibliyi qeyd olundu.

Forumda Azərbaycan Sahibkarlar Konfederasiyası İdarə Heyətinin vitse-prezidenti Vüqar Zeynalov, Azərbaycan-Türkiyə İş Adamları Birliyinin İdarə Heyətinin üzvü Zalbəy Ağadadaşov və Müstəqil Sənayeçi və İş Adamları Dərnəyinin İdarə Heyətinin sədri Rəşad Cabirli çıxış edərək, universitet və sənaye əməkdaşlığının əhəmiyyətindən, peşə təhsilinin vacibliyindən, həmçinin sahibkarlarla ortaq layihələrin həyata keçirilməsinin önəmindən danışdılar.

Forum müzakirələrlə davam etdi və iştirakçılar universitet-sənaye əməkdaşlığının inkişafı üçün təkliflərini irəli sürdülər.

Forumun sonunda tədbir təşkilatçıları bu platformanın davamlı olacağı və yeni əməkdaşlıqların qurulmasına imkan yaradacağı barədə məlumat verdilər. “Bu forum sadəcə bir görüş deyil, gələcək innovativ layihələrin başlanğıcıdır” – deyə vurğulandı.