2025-ci il fevralın 27-də Xəzər Universitetinin koordinatoru olduğu ERASMUS+ DIRNA layihəsi çərçivəsində “İnstitusional repozitoriya şəbəkəsi daxilində inklüziv təhsil” adlı təlim keçirildi.

Təlimdə layihə çərçivəsində iştirak edən universitetlərin – Xəzər Universiteti, Bakı Dövlət Universiteti, Azərbaycan Texniki Universiteti, Dövlət Gömrük Komitəsinin Akademiyası, Naxçıvan Dövlət Universiteti, Gəncə Dövlət Universiteti, Lənkəran Dövlət Universiteti və Mingəçevir Dövlət Universitetinin əməkdaşları  əyani və onlayn şəkildə iştirak etdilər.

Təlimçi Təhsil İnstitutunun Təhsildə innovasiyalar şöbəsinin mütəxəssisi Ətir Quliyeva idi. O, ilk növbədə institusional repozitoriyanın tarixi, yaradılma məqsədi, strategiyası və  funksiyası haqqında məlumat verdi. 

Ötən əsrin 80-ci illərində inklüziv təhsil anlayışının meydana çıxması, 1994-cü ildə öz kulminasiya dövrünü Salamanka bəyannaməsi ilə yaşadığını, Salamanka bəyannaməsinin məqsədinin isə xüsusi təhsil müəssisələrinin sayının azaldılması və onların ümumi təhsilə inteqrasiya olunmasına təşviq etməkdən ibarət olduğunu qeyd etdi.

İnklüziv təhsildə xidmətlərin təmin olunmasında məhdudiyyətli şəxslərin yaxından köməyinin, iştirakının əvəzolunmazlığını vurğuladı. İnklüziv təhsil üçün yararlı ola biləcək rəqəmsal resurslar, platformalar – Moodle, Ava Scribd, NVDA, Colour Oracle, Atbar, DocsPlus və s., video və multimedia materiallar haqqında ətraflı məlumat verdi.