2025-ci il  fevralın 21-də Xəzər Universiteti Mədəni Antropologiya və Folklor İnstitutunun təşkilatçılığı ilə universitetin Mərmər salonunda “Dilimiz kimliyimizdir: dilimizi qoruyaq!” mövzusunda  maarifləndirici tədbir keçirildi. Tədbirin məqsədi Azərbaycan dilinin hazırkı səviyyəyə çatmaq üçün hansı çətinliklərdən keçdiyini, necə formalaşdığını və ən əsası dilimizi necə qorumalı  olduğumuzu iştirakçılara çatdırmaq idi.

Tədbir Azərbaycan Dövlət Himninin ifası ilə başlandı. Xəzər Universitetinin birinci kurs tələbələri Nigar Ələsgərli  və Pəri Nəsibova Xalq şairi Bəxtiyar Vahabzadənin “Ana dilim“ şeirini söylədilər. Xəzər Universitetinin Kamera orkestrının çıxışından sonra söz Mədəni Antropologiya və Folklor İnstitutunun koordinatoru Dos. Aynur Qəzənfərqızına verildi. O, “21 fevral Beynəlxalq Ana dili Günü”nün yaranma tarixindən danışdı və qeyd edilməsinin vacibliyini vurğuladı. Hər zaman, hər yerdə ana dilini qorumağın müqəddəs borc olduğunu qeyd etdi.

Xəzər Universitetinin qurucusu, Direktorlar və Qəyyumlar Şurasının sədri Prof.Akad. Hamlet İsaxanlı çıxışında   ədəbi dil tariximizdən, dilimizin keçdiyi inkişaf yolundan, Azərbaycan dilinin öyrənilməsinin  ingilis dilli Xəzər Universiteti üçün önəmindən danışdı və qeyd etdi ki, Xəzər Universitetində bütün ixtisaslar üzrə Azərbaycan dili tədris olunur.

Xəzər Universitetinin müəllimləri aşıq Ramin Qarayev və müğənni Məhsəti Cabbarova Hamlet İsaxanlının sözlərinə “Gödək donu” havası üstündə  şən mahnı ifa etdilər.

Azərbaycan Respublikasının sabiq təhsil naziri - türkoloq, filologiya elmləri doktoru, Prof. Firudin Cəlilov çıxışında dünya dilləri içərisində türk dilləri ailəsinin mövqeyi, türk dillərinin xüsusiyyətləri, sinharmonizm qanunu, türk dillərində olan ümumi və xüsusi qrammatik kateqoriyalar barəsində danışdı.  Qədim türklərin məskəni, ulu dil nəzəriyyələri haqqında məlumat verdi. Dillərdə olan sözyaratma, sözalma proseslərinə toxundu, türklər üçün ortaq terminologiyanın yaradılması istiqamətində işlərin vacibliyini vurğuladı. Çıxışının sonunda  öz kitablarını Xəzər Universitetinin kitabxanasına bağışladı.

Xəzər Universiteti Dillər və ədəbiyyatlar departamentinin müəllimi, filologiya üzrə fəlsəfə doktoru Sevinc Qəmbərli çıxış edərək, Azərbaycan dilinin dialektologiyası  və müvafiq terminlərdə olan dəyişikliklər,  bu sahədəki yeniliklər haqqında danışdı. Türk dilləri ailəsində ilk dəfə olaraq Azərbaycan dilində dialektoloji atlasların tərtib edilməsini,1990-ci ildə "Azərbaycan dilinin dialektoloji atlası", 2015-ci ildə "Naxçıvan dialektoloji atlası " və 2022-ci ildə isə "Qarabağ və Şərqi Zəngəzur dialektoloji atlası”nın işıq üzü gördüyünü qeyd etdi.

Tədbir Xəzər Universitetinin Kamera orkestrinın çıxışı ilə başa çatdı.

Nigar Ələsgərli

Xəzər Universiteti,

Azərbaycan dili və ədəbiyyat müəllimliyi ixtisası, 1 kurs