Xəzər Universiteti İngilis dili və ədəbiyyatı departamenrinin müdiri Dr. Milana Abbasova 2025-ci il fevralın 3-dən 11-dək Bakıdakı "Evrika" liseyinin Pedaqoji Təcrübə və İnkişaf Mərkəzinin Hindistanın "Modern Public School" məktəbi ilə birgə təşkil etdiyi Elmi və Mədəni Mübadilə Proqramında iştirak edib.

Proqram çərçivəsində Dr. Abbasova "Modern Public School" məktəbinin müəllimləri üçün innovativ pedaqoji yanaşmalar və dil tədrisinin metodologiyasına həsr olunmuş ixtisaslaşdırılmış təlim keçirib. Bundan əlavə, o, Cəvahirləl Nehru Universiteti və Dehli Universitetində dil və dilçilik ixtisası üzrə təhsil alan tələbələr və professor-müəllim heyəti ilə görüşərək, dilçilik tədqiqatları və təhsil təcrübəsi sahəsində fikir mübadiləsi aparıb.

Akademik səfər zamanı Abbasovanın da tərkibində olduğu Azərbaycan nümayəndə heyəti Azərbaycan Respublikasının Hindistandakı fövqəladə və səlahiyyətli səfiri Elçin Hüseynov və attaşe Rauf İsmayılovla görüşüb. Görüşdə iki ölkə arasında təhsil əlaqələrinin möhkəmləndirilməsində beynəlxalq akademik əməkdaşlığın və mədəni mübadilənin əhəmiyyəti vurğulanıb.

Bu proqram Azərbaycan və Hindistan arasında akademik tərəfdaşlığın inkişafı və mədəniyyətlərarası anlaşmanın təşviqi üçün əhəmiyyətli platforma rolunu oynayıb.