Xəzər Universiteti Siyasi elmlər və fəlsəfə departamentinin 2025-ci ildən etibarən təşkil edəcəyi akademik tədbirlərin Khazar Talks başlığı altında keçirilməsinə qərar verilmişdir. Khazar Talks-un ilk seminarı üçün hazırda dünyanın ən aktual mövzularından olan süni zəka seçilmişdir. Buna müvafiq olaraq Ankara Hacı Bayram Veli Universiteti Beynəlxalq münasibətlər kafedrasından Prof. Erman Akıllı`ya, SETA-dan isə Dr. Gloria Özdemir`ə akademik seminar ilə bağlı təklif göndərilmişdir. Türkiyəli tədqiqatçılarla müzakirələrdən sonra programın mövzusu “Texnologiyanın geosiyasəti” olaraq müəyyən edilmişdir. Beləliklə, Xəzər Universiteti Siyasi elmlər və fəlsəfə departamentinin təşkilatçılığı ilə 2025-ci il fevralın 18-19-da “Texnologiyanın geosiyasəti” akademik seminarı baş tutmuşdur. Qeyd edək ki, Dr. Gloria Özdemir bu ildən etibarən Xəzər Universitetində “Texnologiyanın geosiyasəti” fənnini magistratura səviyyəsində tədris etməyə başlamışdır.
Mərmər salonda keçirilən açılış mərasimində universitetin rəhbərliyi, əməkdaşları, tələbələr və mütəxəssislər iştirak etmişlər. Türkiyənin Azərbaycana yeni təyin olunmuş səfiri Prof. Birol Akgün tədbirin qonağı olmuşdur. Qeyd edək ki, Xəzər Universiteti ölkədə səfirin ilk gəldiyi ali təhsil müəssisəsidir.
Açılış proqramı Siyasi elmlər və fəlsəfə departamentinin müdiri Dos. Orxan Vəliyevin moderatorluğunda öz işinə başlamışdır. Dos. Vəliyev öz çıxışında Khazar Talks layihəsi, texnologiya geosiyasəti seminarının təşkili haqqında qısa məlumat vermişdir. Sonra Azərbaycan və Türkiyənin dövlət himnləri ifa edilmişdir.
Xəzər Universitetinin qurucusu, Direktorlar və Qəyyumlar Şurasının sədri Prof. Akad. Hamlet İsaxanlı açılış nitqində Türkiyə səfiri Prof. Birol Akgün`ü və qonaqları salamlamış, səfirin ilk səfərini Xəzər Universitetinə etdiyi üçün təşəkkürünü bildirmişdir. Prof. İsaxanlı texnoloji inkişafın siyasətə olan təsiri, texnologiyanın dünyanı dəyişdirdiyini, süni intellektin isə dünyaya, insan həyatına gözlənilməz təsiri haqqında danışmışdır. Buna müvafiq olaraq insan həyatına təsir imkanları artan süni zəkanın diqqətlə izlənilməli olduğunu vurğulamışdır.
Səfir Prof. Birol Akgün öz çıxışında texnoloji inkişafın fayda ilə bərabər zərərlərinin də olduğundan, bununla bərabər texnoloji inkişafı nəzərə almamağın da mümkün olmadığından, texnoloji istifadəni məqsədli şəkildə aparmağın zərurətindən bəhs etmişdir. Səfir Türkiyənin xüsusilə hərb sənaye çərçivəsində olmaqla yeni texnologiya istehsalında əhəmiyyətli bir mərkəzə çevrildiyini vurğulamışdır. Bu çərçivədə Türkiyə-Azərbaycan arasındakı strateji müttəfiqliyə də toxunmuşdur.
Seminarın birinci günündə Dr. Gloria Özdemir “Süni zəkaya giriş” (Introduction to AI) və “Süni zəka, beynəlxalq münasibətlər və texnopolar sistem” (AI, International Relations, and Technopolar System) mövzularında mühazirə oxumuş, sualları çavablandırmışdır.
Açılış mərasimində iştirakçılara Xəzər Universiteti Musiqi və incəsənət departamentinin müdiri, əməkdar müəllim, tanınmış pianoçu Zülfiyyə Sadıqovanın rəhbərliyi ilə universitetin Kamera orkestrinin konsert proqramı təqdim olunmuşdur.
Günün sonunda Türkiyə Məzunları, Aydınlar və İş adamları Platforması Türkiyə məzunları, Türkiyə Respublikasının Azərbayandakı səfirliyinin təhsil və media müşavirləri, Xəzər Universiteti müəllimlərinin iştirakı ilə qonaqların şərəfinə ziyafət vermişdir.
Tədbirin ikinci günündə Prof. Erkan Akıllı “Türkiyə və Türk Dünyasının texnoloji əməkdaşlığı” (Türkiye and Turkic World Cooperation in Technology) və “Terrorla mübarizə, süni zəka və Qara Dəniz reqionunun təhlükəsizliyində süni zəkanın istifadəsi”(Counterterrorism, AI and Usage of AI in the security of the black sea region) mövzularında mühazirə oxumuş, müzakirələr aparılmışdır.
Qonaq məruzəçəçilərə Xəzər Universitetinin təşəkkür sertifikatı və hədiyyələr təqdim edilmişdir. Hədiyyə təqdimatında Tarix və arxeologiya departamentinin müdiri Dos. Telman Quliyev, İctimai əlaqələr və media qzrə direktor Əlövsət Əmirbəyli iştirak etmişlər.
Seminar xatirə şəklinin çəkilməsi ilə tamamlanmışdır.
Tədbirin açılış proqramı Azərbaycan və Türkiyə mediasında işıqlandırılmışdır:
https://www.ekoturk.com/son-dakika/bakude-yapay-zeka-ve-sorumlu-kullanimi-konusuldu/
Copyright © Xəzər Universiteti, 2025
