“Xəzər Xəbər” jurnalının baş redaktoru

cənab Hamlet İsaxanlıya

Azərbaycanın dünyaya, beynəlxalq elm məkanına tanıdılması mediamızın zamana, illərə sığmayan peşə borcu, vətəndaşlıq məsuliyyəti kimi daim aktuallığını saxlayır. Həqiqətlərimizin beynəlxalq ictimaiyyətinə çatdırılmasını davamlı prosesə çevirmək isə sözün əsl mənasında fədakarlıqdır. Bu fədakar missiyanı həyata keçirən media orqanlarımızdan biri də 30 illik yubileyini qeyd edən “Xəzər Xəbər” jurnalıdır. 

“Xəzər Xəbər” tariximizin, elmimizin, mədəniyyətimizin, adət-ənənələrimizin, iqtisadi imkanlarımızın və dövlətimizin siyasətinin yorulmaz təbliğatçısıdır. Mətbu orqanının dərin mülahizə və mükalimələrə əsaslanan fundamental materiallarını, dəyərli imzalarının aktual təqdimatlarını gözəl tərtibat və sanballı tiraj tamamlayır. Tam əminliklə demək olar ki, jurnal sahəvi media orqanlarının sırasında son dərəcə dəyərli məxəzdir. Yüksək vətəndaşlıq xidmətinin dolğun nümunəsini yaratmış “Xəzər Xəbər”dən danışmaq ona görə xoşdur ki, jurnal özündə müstəqilliyimizin 30 ilinin fəxr salnaməsini də yaşadır.

Hörmətli Hamlet müəllim, “Xəzər Xəbər”in ötən müddətdə keçdiyi yol onun gələcəyi üçün etibarlı təminatdır. Sizi və rəhbərlik etdiyiniz kollektivin hər bir üzvünü nəşrin 30 illik yubileyi münasibəti ilə təbrik edir, geniş diapazona malik fəaliyyətinizin yeni-yeni yaradıcılıq uğurları ilə zənginləşməsini arzulayırıq.

Hörmətlə:                                           

Azərbaycan Mətbuat Şurasının sədri

Rəşad Məcid