2024-cü il dekabrın 10-da Xəzər Universitetinin Mərkəz kampusunda universitetin  “Elm və Sənət Məclisi”nin 82-ci məşğələsi keçirildi. Məşğələdə universitetin əməkdaşları, alim və mütəxəssislər iştirak edirdilər. Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı tədbiri açıq elan edəndən sonra Məclisin üzvü, görkəmli tarixçi alim və şair Şahin Fazilin xatirəsi yad olundu.

Prof.Akad. Hamlet İsaxanlı məclisin növbəti məruzəçisini - ABŞ-da yaşayan, tanınmış azərbaycanlı politoloq Ramiz Yunusu iştirakçılara təqdim etdi. Ramiz Yunusun “Çoxqütblü dünya və Cənubi Qafqaz üçün perspektivlər” mövzusunda məruzəsi iştirakçılar tərəfindən maraqla dinlədildi.

Məruzə ətrafında  müzakirələrdə Baba Bayramlı, Hamlet İsaxanlı (Xəzər Universiteti), Afət Seyidzadə (BDU), Solmaz Tohidi (AMEA Şərqşünaslıq İnstitutu) və Xatirə İsmayılova (AMEA Tarix və Etnologiya İnstitutu) çıxış etdilər.

Sonra Xəzər Universiteti Avrasiya Akademiyasının yaradılmasına həsr olunmuş film nümayiş etdirildi və məruzəçi Ramiz Yunusa Avrasiya Akademiyasının Mirzə Fətəli Axundzadə mükafatı təqdim olundu. Ramiz Yunus məşğələnin təşkilinə və mükafata görə təşəkkürünü bildirdi.