2024-cü il dekabrın 4-də  Xəzər Universitetinin koordinatoru olduğu Erasmus+KA2 proqramının “Azərbaycanda İnstitusional Repozitoriyalar (Elektron Arxiv) şəbəkəsi vasitəsilə tədqiqat potensialının inkişafı” (DIRNA) adlı layihəsi çərçivəsində universitetdə “Açıq giriş və elm diplomatiyası” adlı tədbir keçirildi.

Tədbirdə layihənin tərəfdaş universitetləri ilə bərabər, Azərbaycanın digər ali təhsil müəssisələrinin rektor, prorektor, kafedra və kitabxana müdirləri iştirak etdilər.

Tədbirin açılışı Xəzər Univesiteti Kamera orkestrinin ifası  ilə başladı.

Rəsmi hissə Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlının  nitqi ilə açıldı. Hamlet İsaxanlı qonaqları salamladı, layihənin əhəmiyyəti və faydaları haqqında məlumat verdi.  Sonra açılış nitqi üçün söz İzmir Yüksək Texnologiya İnstitutunun (İYTE; Türkiyə) rektoru Prof.Dr. Yusuf Baran`a verildi.  

Beynəlxalq əlaqələr şöbəsinin müdiri Fatimə Vəliyeva Xəzər Universiteti haqqında təqdimatla çıxış etdi.

Tədbirdə Xəzər Universiteti Kitabxana İnformasiya Mərkəzinin direktor müavini Aytac Misgərli DIRNA layihəsi, onun mahiyyəti, məqsədi, fəaliyyəti və  başlandığı dövrdən bu günə qədər görülən işlər, layihənin tərəfdaş olmayan universitetlər üçün də faydaları haqqında ətraflı məlumat verdi.

Tədbir Yusuf Baran`ın "Açıq giriş və elm diplomatiyası" adlı mövzusu ilə davam etdi. Rektor elm siyasəti, mahiyyəti, yalnız yerli deyil, bəşəri problemlərin həllində onun rolundan, ləyaqət, şəffaflıq, açıqlıq prinsiplərinin əsas tutulması lüzumundan geniş danışdı.

İYTE kitabxana direktoru Gültekin Gürdal “Araşdırmanızın sərhədlərini aşın: açıq giriş ilə fərq yaradın” mövzusundakı çıxışında müasir dövrdə elmi araşdırmaların müəyyən bir çərçivə daxilində deyil, cəmiyyətə əlçatanlığının mümkünlüyü, süni intellektin artıq elm aləminə daxil olması və gələcəkdə onun elmi araşdırmalardakı rolundan bəhs etdi.

Tədbirdə Xəzər Universitetinin rektoru Dos. İradə Xəlilova və Yusuf Baran  anlaşma memorandumu imzaladılar.