2024-cü il noyabrın 20-də “Avey” Dövlət Tarix-Mədəniyyət Qoruğunda (Qazax rayonu) AMEA Arxeologiya və Antropologiya İnstitutunun “Qazax paleolit arxeoloji ekspedisiyası”nın 2024-cü ilin iyul ayında Qoruq ərazisində apardığı tədqiqatların yekunlarına dair elmi seminar keçirilmişdir. Seminarda qoruğun rəhbəri Dr. Səadət Əliyeva və əməkdaşları, institutun böyük elmi işçisi, Xəzər Universiteti Tarix və arxeologiya departamentinin müəllimi Dr. Yaqub Məmmədov və Dos. Mansur Mansurov iştirak etmişdir.

Ekspedisiyanın rəhbəri Dr. Yaqub Məmmədov aparılmış tədqiqatların yekunlarına dair geniş məruzə ilə çıxış etmiş, sonda iştirakçıları maraqlandıran suallar ətrafında müzakirə aparılmışdır. 

Qeyd edək  ki, Azərbaycanda 1953-cü ildə M.M. Hüseynov tərəfindən paleolit dövrün öyrənilməsinin əsasının qoyulduğu Damcılı mağarası və eləcə də Daşsalahlı mağarası Avey dağında yerləşir. Gələcəkdə bu istiqamətdə tədqiqatların davam etdirilməsi nəzərdə tutulur.