Dzień dobry! Sabahınız xeyir!

Mən, Zöhrə Məmmədova Humanitar, təhsil və sosial elmlər fakültəsinin Politologiya ixtisası üzrə 3-cü kurs tələbəsiyəm və mübadilə təcrübəmi sizinlə bölüşməkdən məmnunluq duyuram.

Mübadilə müddətim 2024-cü il fevralın 1-dən iyunun 30-dək Polşanın Vrotslav Universitetinin Sosial elmlər fakültəsinin Avropa Tədqiqat İnstitutunda baş tutdu.

 “Erasmus+” proqramında əsas məqamlardan biri Avropa Parlamentinin Vrotslavdakı Əlaqələr Bürosunda canlı seçki debatlarında iştirak etməyim oldu. Avropa Parlamentinin Əlaqələr Bürosunun direktoru Stiven Klark ilə görüşmək və Avropanın siyasi sistemləri haqqında  əlavə biliklər əldə etmək imkanım oldu.

Səylərimin qiymətləndirilməsi kimi, “Polşa haqqında məlumatlar: Mədəni diplomatiya təcrübədə” təhsil təşəbbüsünü uğurla başa vurduğuma görə mənə sertifikat təqdim olundu. “Erasmus+” şəxsi inkişafıma da töhfə verdi. Müxtəlif sosial tədbirlərdə, o cümlədən “Erasmus” axşamlarında iştirak etdim, burada müxtəlif ölkələrdən olan tələbələrlə cəmiyyət və mənəvi yaxınlıq hissini inkişaf etdirdim. Bu qarşılıqlı əlaqələr dil bacarıqlarımı təkmilləşdirməklə yanaşı, mənə dəyərli xarici dostlar və həmkarlar şəbəkəsi yaratmağa imkan verdi.

Polşa zəngin tarixə və mədəniyyətə malik ölkədir. Müxtəlif tarixi şəhərləri və görməli yerləri, habelə Avropanın ən böyük zooparkı və Vrotslavdakı ən böyük botanika bağını gəzdim.

Osvensim Holokost abidəsini görmək məndə dərin iz qoydu və tarixi yaddaşın əhəmiyyətini bir daha təsdiq etdi.

Mübadilə proqramı ərzində çoxlu xatirələr, təcrübələr qazandım, mədəni biliklərimi zənginləşdirdim, peşəkar və şəxsi bacarıqlarımı inkişaf etdirdim. Buna görə Xəzər Universitetinə son dərəcə minnətdaram və digər tələbələri “Erasmus+” proqramının təklif etdiyi tədris və təcrübədən yararlanmağa təşviq edirəm.

Zöhrə Məmmədova