2024-cü il sentyabrın 24-də “Coders Azerbaijan” tədris mərkəzinin məhsulu olan "Performans Sistemi"- nin təqdimat günü keçirilib.

Təqdimat Almaniyanın “Bildungswerk Der Baden” qurumu və “Coders Azerbaijan”ın birgə təşkilatçılığı ilə baş tutub.

Tədbirdə əvvəlcə Almaniyanın təhsil sistemi və Azərbaycanda kadr ehtiyacları müzakirə edilib, sonra universitet nümayəndələrinin iştirakı ilə panel müzakirəsi aparılıb və "Performani Systemi" adlı mobil tətbiq təqdim olunub.

Panel müzakirəsində Xəzər Universitetinin Fizika və elektronika departamentinin müəllimi Sevinc Quluzadə də  çıxış edərək, rəqəmsal məlumat sistemlərinin müasir rolu və gələcək inkişaf perspektivləri barədə fikirlərini bölüşüb.

Tələbə məlumatlarını və idarəetmə sistemini bir araya gətirən mobil tətbiq geniş funksionallıqları ilə fərqlənir və tələbələrin motivasiyasını daima yüksək tutmaq məqsədi ilə hazırlanmışdır. Bu geniş miqyaslı platforma “Coders Azerbaijan” tərəfindən ölkə daxilində bir çox müəssisəyə uyğun şəkildə inteqrasiya edilmiş və xarici bazara da çıxarılmışdır.

Qeyd edək ki, “Coders Azerbaijan” 2015-ci ildə təsis edilmiş və 2017-ci ildən etibarən intensiv bootcamp modeli əsasında tədris fəaliyyətinə başlamışdır. Həmçinin, “Coders Azerbaijan” ölkədə “Python İnstitution” və “IC Councils”-in yeganə akkreditasiya olunmuş təhsil mərkəzidir.