Xəzər Universitetinin İdarəetmə və tələbə işləri üzrə prorektoru, Dillər və ədəbiyyatlar departamentinin professoru İsaxan İsaxanlı 2024-cü il sentyabrın 19-21-də  böyük rus şairi Serqey Yeseninin anadan olmasının 129 illiyinə həsr edilmiş “Serqey Yesenin: Kontekst, Poetika, Mətnşünaslıq” mövzusunda Beynəlxalq Yesenin Konfransında iştirak etdi.

Sentyabrın 19-da Moskvada M.Qorki adına Ədəbiyyat İnstitutunda başlayan konfransın ardı ayın 20-də Ryazanda S.Yesenin adına Ryazan Dövlət Universitetində, ayın 21-də Yeseninin doğma kəndi Konstantinovoda Yesenin Muzeyində keçirildi.

Konfransda İsaxan İsaxanlı  “Əliağa Kürçaylı Serqey Yesenin yaradıcılığının Azərbaycan dilinə ən populyar tərcüməçisi kimi” mövzusunda plenar məruzə etdi. Məruzə böyük maraqla qarşılandı. M.Qorki adına Ədəbiyyat İnstitutunda fəaliyyət göstərən Yesenin Komitəsinin sədri Prof. Şubnikova-Quseva Nataliya İqorevna və komitənin elmi katibi filologiya elmləri doktoru Maksim Skoroxodov İsaxan İsaxanlı haqqında xoş sözlər dedilər və onun Yesenin komitəsi ilə işbirliyini yüksək qiymətləndirdilər.

Sonra, günün ikinci yarısında Konstantinovo Elmi-Mədəni Mərkəzində Yeseninlə bağlı çap olunmuş və çapa hazırlanan nəşrlərin təqdimatı oldu. İsaxan İsaxanlı hazırda tamamlanmaq üzrə olan layihə - Azərbaycan şairlərinin Yeseninə həsr etdikləri şeirlərin kitab halında çap olunması haqqında geniş məlumat verdi.

Tədbir zamanı mədəni proqram kimi Konstantinovo Dövlət Qoruq Muzeyinə ekskursiya təşkil olundu, Yeseninin ev muzeyi, təhsil aldığı məktəb, Konstantinovo kəndinin mülkədar qızı, Yeseninin “Anna Sneqina” poemasının baş qəhrəmanının proobrazı Lidiya Kaşinanın ev-muzeyi və digər Yeseninlə bağlı yerlər ziyarət edildi.