Xəzər Universitetinin təsisçisi, Direktorlar və Qəyyumlar Şurasının sədri Prof. Akad. Hamlet İsaxanlı Pekin Xarici Dillər Universiteti (PXDU) Asiya fakültəsinin “Beynəlxaq nüfuzlu alimlərin qısamüddətli akademik səfəri" proqramı çərçivəsində 2024-cü il sentyabrın 16-28-də “Nizami Gəncəvinin əsərlərində zaman və məkan fəlsəfəsi”, "İki mədəniyyət: təbiət və humanitar elmlər arasında sədlər və körpülər", “Ali təhsildə keyfiyyət konsepsiyası”, “Azərbaycan ədəbiyyatında maarifçilik hərəkatı - M.F.Axundov yaradıcılığına baxış” və “Azərbaycan milli kimliyinin inkişaf tarixçəsi” mövzularında mühazirələr oxuyacaq.
H. İsaxanlı, eyni zamanda, sentyabrın 19-20-də Pekin Mədəniyyət Forumunda iştirak edəcək. Qeyd edək ki, o, həmçinin, sentyabrın 27-29-da Pekində 1-ci Çin Azəbaycanşünaslıq Beynəlxalq Elmi Konfransının açılışında da plenar məruzə edəcəkdir.
Qeyd edək ki, Çinin dövlət qurumları, xüsusən də Xarici İşlər Nazirliyi üçün kadrlar hazırlayan, 101 xarici dilin tədris olunduğu PXDU-da Azərbaycan dili kafedrası 2016-cı ildə yaradılıb. İlkin mərhələdə Azərbaycan dili üçüncü dil kimi tədris olunsa da, Çinin Təhsil Nazirliyinin qərarına əsasən, 2018-ci ildə ümumrespublika imtahanı əsasında Azərbaycan dili ixtisasına qəbul aparılıb və 9 tələbə dörd il ərzində Azərbaycan dilini öyrənərək, Çinin ilk azərbaycanşünas kadrları olub. PXDU-da birinci qəbulda (2018-2022-ci illər) Azərbaycan dili ixtisası üzrə təhsil almış tələbələr Azərbaycan dili kafedrasının ölkəmizlə bağlı həyata keçirdiyi müxtəlif layihə və tədbirlərdə yaxından iştirak ediblər. “Nəsimi İli”ndə “Azərbaycan dili və Ədəbiyyatı Sərgisi”nin təşkilində fəallıq göstəriblər, “Nizami Gəncəvi İli”ndə isə dahi Azərbaycan şairi və mütəfəkkirinin 880 illiyi münasibətilə çap olunmuş “Nizami irsi” jurnalında tələbələrin 11 araşdırma məqaləsi və tərcümə işi işıq üzü görüb. Tədris dövründə Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev, Azərbaycan Milli Elmlər Akademiyasının prezidenti Akad. İsa Həbibbəyli və başqaları Azərbaycan dili kafedrasında olub, tələbələrə mühazirə oxuyublar.
Bu il Çinin ümumrespublika ali məktəblərə qəbul imtahanında uğurlu nəticələr qazanan 13 gənc PXDU-nun Azərbaycan dili ixtisasına qəbul olunub.