Iyunun 11-də Xəzər Universitetində BDU-nun müəllimi, Texniki elmlər doktoru Dos. Ziya Əliyev tərəfindən “Kvant materialları: dizayn, tədqiqat və tətbiq perspektivləri” (“Quantum Materials: Design, Exploring and Applications Perspectives”) mövzusunda seminar keçirilib. Müzakirə şəraitində keçən seminarda Xəzər Universitetinin Direktorlar və Qəyyumlar Şurasının sədri, Prof. Akad. Hamlet İsaxanlı, professor - müəllim heyəti və tələbələr iştirak ediblər.
Qeyd edək ki, Ziya Əliyev materialşünaslıq üzrə dosent və elmlər doktorudur. 2009-cu ildə Bakı Dövlət Universitetində fəlsəfə doktoru, 2021-ci ildə isə texniki elmlər doktoru elmi dərəcələri alıb. 2013-2014-cü illərdə Donostia Beynəlxalq Fizika Mərkəzində və İspaniyanın Bask Ölkə Universitetində postdoktoranturada oxuyub. Onun tədqiqatı əsasən termoelektrik enerjinin çevrilməsi, spintronika, kvant hesablamaları və optoelektronika üçün innovativ qabaqcıl elektron materialların dizaynı, sintezi və monokristal sahələrinə aid olub. Ziya Əliyevin tədqiqat nəticələri nüfuzlu indeksli jurnallarda dərc edilib. Həmin nəticələr orijinal tədqiqat xarakterli məqalələrində daha çox öz əksini tapıb.